Mae’n rhaid cymryd y penderfyniad i gau ysgolion yn gynt, yn ôl y Gweinidog Addysg Leighton Andrews.

Dywedodd bod oedi’n creu mwy o ansicrwydd nag sydd rhaid ynglŷn â dyfodol ysgolion.

“Dw i’n credu bod ein proses ni ar gyfer penderfynu a fydd ysgol yn cau yn cymryd yn rhy hir,” meddai.

“Mae yna resymau da dros gymryd ein hamser i asesu cynigion sydd wedi cael eu gwrthwynebu… Ond, rhaid i ni edrych ar y sustem a dw i yn credu ei bod yn rhy araf.”

Anodd

Dywedodd Leighton Andrews ei fod wedi trafod y mater yn syth ar ôl cael ei benodi’n weinidog addysg.

“Yn y pen draw mae’n broses anodd i gymunedau, athrawon, awdurdodau lleol a chyrff llywodraethwyr ac, wrth gwrs, i ddisgyblion.

“Po hiraf y mae’n ei gymryd i ni wneud penderfyniad, mwyaf o ansicrwydd sydd ynglŷn â’r ysgol.

“Mae pobol eisiau gwybod ein bod ni’n penderfynu o’u plaid nhw, ond os nad yw hynny’n bosib o leiaf fe allwn ni benderfynu’n gyflym.”

Y drefn

Mae cynghorau ledled Cymru wedi wynebu gwrthwynebiad chwyrn gan rieni wrth geisio cau ac aildrefnu ysgolion.

Mae’n bosib iddyn nhw gyfeirio cynlluniau dadleuol i gau ysgolion at weinidogion os oes gwrthwynebiad.

Fis Tachwedd diwethaf dywedodd y cyn Brif Weinidog Rhodri Morgan ei fod yn disgwyl i tua 170 o ysgolion gau oherwydd cwymp yn nifer y disgyblion.