Warren Gatland
Gyda gêm ryngwladol olaf 2011 y tu ôl i ni, beth yw’r hyn yr ydym wedi dysgu o’r gêm honno?

Heb os fe wnaeth y rhanbarthau ddioddef ar y maes o ganlyniad i’r gêm ryngwladol. Cafwyd canlyniad arswydus i’r Gleision yn Nulyn tra bod Ravenhill wedi profi’n dalcen caled i’r Scarlets er iddyn nhw lwyddo i ennill pwynt bonws am eu hymdrechion.

Ond efallai mai’r rhwystr mwyaf anfanteisiol i’r rhanbarthau yw eu paratoadau ar gyfer gemau Cwpan Heineken y penwythnos yma. Wrth ystyried fod Munster wedi cychwyn y gêm yn erbyn y Gweilch gyda Paul O’Connell a Ronan O’Gara ar y fainc ddydd Sadwrn, roeddent yn gobeithio gorffwys y rhain cyn y gêm Gwpan Heineken yn erbyn y Scarlets yr wythnos yma. Mae’n glod i’r Gweilch orfodi iddynt ddod i’r cae i geisio adfer y canlyniad, a’u hatal rhag gwneud hynny.

Bu Warren Gatland ei hun yn ddi-flewyn ar dafod yn datgan mai am resymau ariannol y trefnwyd y gêm yn erbyn  Awstralia’r penwythnos diwethaf ac nad oedd y trefniant yn ddelfrydol o ran ffitrwydd a chyflwr corfforol y chwaraewyr.

Er hyn, ni allech amau  brwdfrydedd y chwaraewyr a gamodd i gae’r Mileniwm b’nawn Sadwrn diwethaf wrth gofio tacl Jamie Roberts a Toby Faletau. Ac ar ben hynny wrth gwrs roedd encore y dewin o’r Amman yn gyfle i’r genedl ffarwelio a’u harwr.

Ond wrth gwrs rhaid edrych ar sut mae’r rhanbarthau’n elwa o’r gêm ryngwladol yn erbyn yr Aussies. Heb y tri neu bedwar gêm arferol sydd yn digwydd yn ystod cyfres yr Hydref eleni, roedd yna dolc yn siŵr o fod yn incwm rygbi Cymru.

Felly wrth gwrs rhaid cadw mewn ystyriaeth mai er lles rygbi yng Nghymru yn gyffredinol fydd yr elw a wnaethpwyd o’r gêm ddydd Sadwrn, ac mae’n adnodd ariannol gwerthfawr i’r rhanbarthau.

Dyfodol

Felly er ein bod yn dal i chwilio am fuddugoliaeth yn erbyn un o fawrion hemisffer y de dan reolaeth Warren Gatland, mae yna bethau i’w dysgu o’r gêm yn erbyn Awstralia.

Er mor braf oedd gweld Shane Williams yn sgorio yn ei weithred olaf ar y llwyfan rhyngwladol, a galar meddwol y cefnogwyr yn diawlio ei henaint, mae yna ddigon o asgellwyr ifanc a chyffrous yng ngharfanau’r pedwar rhanbarth Cymreig a fydd yn gwthio am lefydd nes y Cwpan Byd nesa.

Ar frig agenda Gatland fydd dod o hyd i’r ‘Prop Ffactor’ nesa, ac yn fwy penodol y prop pen tynn nesa. Cafodd Scott Andrews fedydd tân yn erbyn y Crysau Aur, ond dyna’r awyrgylch gorau i ddysgu ynddo. Mae Adam Jones yn 30 mlwydd oed felly fe fydd angen aeddfedu’r genhedlaeth nesa o sgrymwyr dros y pedair blynedd nesa.

Mae’r hyfforddwr cenedlaethol wedi codi gwrychyn ambell gefnogwr wrth ddiystyru rhai propiau aeddfetach yn y rhanbarthau gan ganolbwyntio ar ieuenctid ar gyfer y dyfodol, ond mae’r polisi yma wedi gweithio mewn safleoedd eraill yn y garfan.

Erbyn hyn mae gan Gymru ddyfnder da o chwaraewyr ym mhob safle arall. Profwyd hynny’r penwythnos yma wrth ystyried fod Alun Wyn Jones a Luke Charteris wedi’u hanafu. Mae olynydd i Martin Williams sef Sam Warburton wedi ei arwisgo yn nhân Cwpan y Byd ac fel y nododd Gatland wedi’r gêm ddydd Sadwrn, Jamie Roberts yw’r hynaf o’r olwyr yn 25 mlwydd oed, nawr fod Shane Williams wedi ymddeol.

Felly’r bennod nesaf ym mhrosiect Gatland a’i dîm o hyfforddwyr yw datblygu’r genhedlaeth nesaf o bropiau!

Aaron Ramsey yn y crys cefnogwyr tîm pêl-droed Prydeinig y Gemau Olympaidd
Caio Higginson sy’n gofyn os ydy Cymdeithas Bêl-droed Cymru wedi dechrau ennill y ddadl yn erbyn tîm GB yn y Gemau Olympaidd?

Fel gornest tynnu rhaff, mae chwaraewr ifanc Cymru wedi eu dal mewn penbleth ynglŷn â’r hyn i ddweud ynglŷn â thîm GB yn y Gemau Olympaidd.

Ar yr un pen i’r rhaff mae Cymdeithas Bêl-droed Cymru, yn ystyfnig ymwrthod rhag datgan gormod o eiriau yn gyhoeddus, dim ond ategu’r hyn maent wedi dweud ers tarddu’r ddadl.

Ac ar ben draw’r rhaff, mae’r pwyllgor Olympaidd a Chymdeithas Bêl-droed Lloegr yn tynnu’n bryfoclyd i’r cyfeiriad arall.

Ac mae gan y ddwy garfan haid o gefnogwyr yn lleisio’u barn hefyd.

Ennill y dydd?

Ond mae’n ddigon posib fod y Gymdeithas Bêl-droed wedi ennill y tir uchel gyda’r datblygiadau diweddaraf yn y mater.

Er i Gareth Bale ac Aaron Ramsey ymddangos yn gwisgo crysau cefnogwyr GB, ni chafwyd ymateb gandryll gyhoeddus gan y Gymdeithas, ac fe ddwedodd Gary Speed yn gyhoeddus nad oedd hyn yn mynd i effeithio ar eu gyrfaoedd rhyngwladol gyda Chymru. A hynny er i rai o gefnogwyr Cymru alw am ddiarddel y ddau o ddyfodol y tîm cenedlaethol a’r crys coch.

Yr wythnos yma mae carfan Cymru wedi bod yn ymarfer ar gyfer y gêm gyfeillgar yn erbyn Norwy ddydd Sadwrn, a Speed wedi cael cyfle i drafod safbwynt y Gymdeithas Bêl-droed gyda’r chwaraewyr tu ôl i ddrysau caeedig.

Wedi hynny cafwyd cyfweliadau gan Joe Allen a Chris Gunter, a oedd wedi newid tôn eu cân rhyw ychydig.

Er nad ydynt wedi gwrthod y syniad o chwarae dros dîm GB, roedd yna gryn dipyn o feddwl tu ôl yw geiriau wrth ymateb i gwestiynau gan y wasg – yn cydnabod safbwynt y Gymdeithas, ac eto dal i bendroni yn dawel bach.

O na fyddai’n Sais…

Yn y cyfamser mae Stuart Pearce, cyn amddiffynnwr Lloegr a’r dyn sydd wedi ei ddewis i hyfforddi tîm GB wedi awgrymu mai Gemau Olympaidd Llundain fydd unig obaith y criw yma o chwaraewyr i chwarae mewn cystadleuaeth ryngwladol fawr.

Wrth wneud hynny mae wedi nodi’r hen alar yng nghyfryngau Prydain, ’Ryan Giggs – o petai e ond yn Sais’.

Un peth sydd yn siŵr, fe fydd y ddadl yma yn parhau tan seremoni agoriadol y Gemau Olympaidd, pan fydd sylw pawb wedi troi at wir gampau’r Olympics.

Ond yn y cyfamser, efallai fod y Gymdeithas wedi ennill y ddadl….am nawr.

Proffil Twitter capten Cymru, Aaron Ramsey
Pwy sy’n cyrraedd XI cyntaf trydarwyr pêl-droed Cymru – Caio Higginson ac Owain Schiavone sy’n dewis y tîm.

Mewn oes lle mae athletwr proffesiynol yn gallu cyfathrebu’n uniongyrchol gyda’r byd trwy ddefnydd cyfryngau cymdeithasol, mae un clwb pêl-droed o Fecsico wedi ceisio dull anarferol o gynyddu eu dilyniant Twitter.

Yn hytrach nag argraffu enwau eu chwaraewr ar gefn eu crysau, mae clwb pêl-droed Jaguares, wedi dodi dolenni Trydar y chwaraewyr ar gefn eu crysau.

Dyma ymgais Golwg360 felly i greu tîm cenedlaethol Cymru ar sail perfformiad y chwaraewyr ar Twitter.

1. @greathover32 – Does gan Wayne Hennessey ddim cyfrif tra bod y cyfrif @boazmihillHCFC yn ymddangos i fod yn un ffug, felly Jason Brown o Aberdeen sy’n cael ei le yn gôl.

2. @jazzrichards – ychydig o amddiffynwyr Cymru sy’n trydar yn anffodus, felly mae cyfle i amddiffynnwr Ifanc Abertawe, a chapten tîm dan 21 Cymru, Jazz Richards

3. @Chrisgunter16 – Mae cefnwr Nottingham Forrest yn drydarwr rheolaidd ac felly’n cadw ei le fel cefnwr chwith.

4. @AshWills84 – Un o’r chwaraewyr cyfredol prysuraf ar Twitter, felly’n graig yng nghanol yr amddiffyn.

5. @25davidstephens – Does dim golwg o’r ddau Collins, Darcy Blake na Danny Gabbidon ar Twitter felly David Stephens ifanc o Hibernian sy’n cael ei gyfle wrth ochr Williams yng nghanol yr amddiffyn.

6. @DaveEdwards4 – wedi cael digon o amser i drydar wrth wella o anaf hirdymor ac yn cael ei le yng nghanol cae.

7. @joe16led – heb gael llawer o lwc gyda Celtic nac anafiadau’n ddiweddar felly bydd Joe Ledley’n falch o gael ei le yn ein XI ar draul @Joe_Allen1 sydd wedi cloi ei gyfrif!

8. @Hal_RK – mae Hal Robson Kanu yn cael ei le yn nhîm Reading eleni ac yn ennill ei le yn nhîm Trydar Cymru hefyd.

9. @churchy18 – Mae Simon Church yn bartnar i @Hal_RK yn nhím Reading ac yn dipyn o fêts gydag ‘e ar Twitter hefyd.

10. @aaronjramsey – un lled ddiweddar i Twitter ydy capten Cymru ond mae ei drydar wedi bod yn prysuro dros yr wythnosau diwethaf.

11. @RobertEarnshaw – bron i 2000 o negeseuon hyd yn hyn ac yn cael ei le yn yr ymosod cyn @stevemorison sydd heb drydar eto a @bellamyofficial sydd heb ddangos digon o ymroddiad gyda dim ond dwy neges hyd yn hyn

Eilyddion:  @DavidCornell27, @Joe_Allen1; @Jack_Collison; @OwainTJones, @stevemorison – bydd angen i Collison, Morison a Jones drydar o leiaf unwaith cyn cael eu hystyried yn y tîm nesaf

Hen Stejars: @JohnHartson10, @RobbieSavage8, @carlrobinson33 – trwy lwc, mae digon o chwaraewyr ifanc yn trydar sy’n golygu nad oes rhaid troi at chwaraewr canol cae y New York Bulls, Carl Robinson!

Hyfforddwr: @raymondverheije – yn anffodus, does dim cyfrif swyddogol gan Gary Speed ar Twitter eto, felly ei ddirprwy, ac un o’r trydarwyr mwyaf dryslyd, Raymond Verheije sydd yng ngofal y tîm.

Ydan ni wedi methu rhywun? Oes digon o’r hen fois yn Trydar i greu tîm pump bob ochr? Croeso i chi adael sylwadau isod.

Gavin Henson yn hysbysebu crys Cymru ar Stadiwm y Mileniwm yn 2010
Caio Higginson sy’n mynegi ei farn ar drosglwyddiad diweddaraf Gavin Henson, sy’n dychwelyd i Gymru gyda’r Gleision.

Ychydig dros flwyddyn sydd ers i Gavin Henson ac Undeb Rygbi Cymru greu PR stỳnt a gorddod y dyfroedd yng Nghymru, trwy ddatgelu poster anferth o Gavin ar ochr Stadiwm y Mileniwm yn gwisgo cit newydd y tîm rhyngwladol. Pa mor ddibwys yw’r atgof yna yng ngholau campau diweddar y tîm cenedlaethol?

Roedd Gavin Henson ar y pryd yn paratoi ar gyfer gyrfa rhan amser ym myd teledu ac yn sôn yn gyhoeddus am ei awydd i adael ei ranbarth Cymreig, Y Gweilch. Hyn oll wedi cyfnod o flwyddyn a mwy o egwyl o’r cae rygbi.

Felly doedd dim llawer o syndod pan ddadorchuddiwyd y poster anferth ohono, nad oedd ambell un o chwaraewyr presennol y tîm cenedlaethol yn rhy hapus, yn enwedig Jamie Roberts a wnaeth sylwadau yn y wasg am y mater.

Flwyddyn yn ddiweddarach, ac mae Henson wedi arwyddo i ranbarth y Gleision.

Pa rôl fydd i Henson

Mae’r syniad o Jamie Roberts a Gavin Henson yn cydweithio fel canolwyr yn briodas mae Gatland eisoes wedi ceisio ei gorfodi. Mae’n ymddangos nad yw’r un ohonynt yn gyfforddus gyda’r rhif tri ar ddeg ar eu cefn – dyna anlwc!

Heb os, bydd angen gorffwyso Jamie Roberts wedi i Gwpan Byd ddod i ben, ac fe fydd y ddau yn cynnig rhywbeth gwahanol  yn safle 12 trwy gydol y tymor. Jamie a’i allu i dorri tyllau yn llinellau’r amddiffyn a Gavin fel ail faswr yn medru llywio’r chwarae.

Nid yw’r Gleision wedi llwyddo i lenwi’r bwlch a adawyd gan Nicky Robinson yn safle’r maswr. Cafwyd yr arbrawf arswydus gyda Sam Norton Knight o Awstralia nes daethpwyd a Dan Parks o Glasgow, sydd yn effeithiol yn ei gicio ond yn chwerthinllyd o sâl yn ei amddiffyn.

Tybed os mai yn safle’r maswr fydd cyfraniad mwyaf Henson i’r Gleision?

Mae’n annhebygol byddwn yn ei weld yn safle’r cefnwr. Fe fydd Leigh Halfpenny yn awyddus i barhau yn y safle hwnnw ar ôl dychwelyd o Seland Newydd, ac mae Chris Czekaj yn chwarae yno’n gyson hefyd.

Ond hefyd mae’n ddigon posib y bydd yn cael ei berswadio i fabwysiadu safle’r cefnwr am nad oes cystadleuaeth gref am grys rif pymtheg Cymru.

Ond fel yw’r achos gyda Gavin Henson o hyd. Nid ble fydd y crwt yn chwarae yw’r broblem, ond ei agwedd a’i effaith ar weddill y garfan. Fe wrthododd Dreigiau Casnewydd Gwent y cyfle i arwyddo’r canolwr am nad oeddent yn credu y byddai’n cyd fynd ag ethos eu carfan o chwaraewyr.

Mae wedi bod yn flwyddyn ansefydlog i’r gŵr o Bencoed ond a fydd ei ddylanwad ar y rhanbarth yr un mor sigledig? Heb brif hyfforddwr a phrif weithredwr yng Nghaerdydd ar hyn o bryd, mae’n ymddangos y bydd angen dylanwad cryf dros y garfan rhag i’r cynhwysyn diweddaraf suro’r cawl.

Mae Cymru wedi graddio o’i grŵp yng Nghwpan Rygbi’r Byd. Caio Higginson sy’n asesu perfformiad Cymru a’i gwrthwynebwyr nesaf.

Haleliwia! Cymru yn y cwarteri ac yn chwarae rygbi sydd wrth fodd y cefnogwyr.

Mi roedd y perfformiad ddoe yn erbyn Fiji’n ennyn gobaith realistig i Gymru wneud rhywbeth go arbennig yn y gystadleuaeth yma.

Bu’r ‘ddau gawr’, fel y cyfeiriwyd atynt gan bob sylwebydd wedi’r gem ddoe, yn wefreiddiol yn hollti amddiffyn Fiji. Cyn i’r gystadleuaeth ddechrau roedd yna bryder fod Cymru yn or-ddibynnol ar nerth Jamie Roberts fel eu prif bygythiad ond gyda dyfodiad George North i’r llwyfan ryngwladol mi fydd pob amddiffyn fydd yn dod yn eu herbyn yn chwysu ryw damaid.

Wrth gwrs her gwbl wahanol fydd y Gwyddelod fore Sadwrn. Mae’n rhaid i mi gyfaddef i’m hwyliau ostwng wedi gwylio Iwerddon yn dofi’r Eidal yn yr hanner cyntaf ac yna torri’n rhydd yn yr ail hanner.

Felly er gorfoledd rhai cefnogwyr ein bod yn osgoi gwledydd hemisffer y De cyn y rownd derfynol, mae pawb yn gwybod pa fath o gem fydd yn ein disgwyl yn erbyn y Gwyddelod. A phawb yn ansicr o’r canlyniad.

Fe fydd O’Connell a’i gyd flaenwyr yn awchu am y frwydr. Mi roedd sylwadau Nick Mallet, hyfforddwr Yr Eidal, cyn y gem ddoe wedi ysbrydoli dynion yr Ynys Werdd ac mae Gatland yn gwybod o brofiad nad yw sylwadau bach sarhaus yn talu ffordd yn erbyn rhain. Fe fydd cais dadleuol Mike Phillips yng nghystadleuaeth y Chwe Gwlad eleni yn ddigon i greu araith danllyd yn ystafell newid Brian O’Driscoll ddydd Sadwrn.

Heb os nac oni bai fydd hon yn gem a hanner i gefnogwyr rygbi diduedd, ac yn 80 munud o straen a gofid i gefnogwyr y ddwy wlad Celtaidd. Ond mae yna ddigon i fod yn hyderus ohono.

Pwy fydd Gatland yn ei ddewis?

Mae’n ymddangos fod y blaenwyr yn fater go syml. Gyda Gethin Jenkins yn dychwelyd i’r tîm wedi cyfnod hirfaith o anafiadau mae wedi profi unwaith eto ei fod yn amhrisiadwy am ei gyfraniad yn y sgrym, chwarae rhydd ac fel trydydd blaenasgellwr ac yn ail faswr. Ac os yw’r adroddiadau’n wir, fydd carfan lawn gan Gatland i ddewis ohono, rhaid ystyried fydd Dan Lydiate yn dychwelyd i’r rheng ôl felly.

Mi fydd gan bawb, ar hyd a lled y wlad, farn am bwy ddylai ddechrau yn yr olwyr. Pwy a fyddai wedi darogan ar drothwy’r gystadleuaeth byddai Rhys Preistland bron yn sicr o’i le fel maswr? Mi fydd Gatland yn craffu yn ofalus am ei dactegau megis meistr gwyddbwyll.

Pwy, allan o bedwar cyfuniad posib, fydd yn ymuno â Jamie Roberts yn y canol? A ydi’n ddoeth i chwarae Lee Byrne? A ydi Leigh Halfpenny yn barod i chwarae yn ei le fel cefnwr? Os yw James Hook yn holliach a ydyw’n dechrau’r gem ac os ydyw ym mha safle? Ac efallai y cwestiwn pwysicaf oll, pwy all gadw Mr O’Drsicoll yn dawel?

Nerth y garfan

Ond y rheswm fwyaf am gynnal yr hyder yw nerth y garfan, a’r fainc yn benodol. Yn erbyn De Affrica, dim ond Bradley Davies a ddaeth oddi ar y fainc fel eilydd i Gymru, lle achubwyd y Springboks gan fyddin o eilyddion a ddaeth i ymateb a momentwm tîm Sam Warburton.

Gyda  Stephen Jones a Ryan Jones yn dychwelyd o anafiadau, perfformiadau diweddar Scott Williams, a Paul James sy’n sgrymiwr werth ei halen ar y llwyfan ryngwladol, fe fydd Cymru yn fwy na hyderus y gall y fainc yma ategu’r momentwm a pherfformiad ei chyd chwaraewyr wrth ymuno â’r ornest yng nghyfnodau hwyrach a dwys y gem.

Felly mae meddygon carfan Cymru wedi efelychu campau’r pair dadeni, ac mae gennym un gawr yn ychwanegol i’r hyn a oedd yn chwedl Branwen. Cawn ni ddim cyfle gwell!