Hywel Wyn Edwards

Hywel Wyn Edwards, Trefnydd yr Eisteddfod, sy’n blogio o faes hynod o braf…

A dyma ni ar y Maes gyda chwta wythnos i fynd cyn y bydd Eisteddfod Genedlaethol Wrecsam a’r Fro yn cychwyn, ac rwy’n gwybod mod i wedi sôn y byddwn i’n blogio mwy, ond mae’r dyddiau’n hedfan heibio yr adeg yma o’r flwyddyn.

Erbyn hyn dwi bron â bod wedi symud i’r Maes – bron â bod meddwn i gan fod y swyddfa yn y broses o symud.  Ond o leiaf, mae ‘na gadair, desg a gliniadur yma, felly mae modd dal i fyny gyda negeseuon a chael eiliad i ysgrifennu hwn!

Mae’n faes hynod o braf.  Roeddem ni i fyny yn y Ganolfan Groeso ddoe yn rhoi trefn ar bethau, ac yn edrych i lawr ar Gylch yr Orsedd, y Maes a’r Pafiliwn.  Er ei bod wedi glawio tipyn dros y dyddiau diwethaf, mae’r Maes mewn cyflwr ardderchog a gobeithio’n arw y bydd hyn yn parhau dros y dyddiau nesaf.

Peth od yw Maes yr Eisteddfod heb Eisteddfodwyr.  Cae ydi o heb y bobl – a’r bwrlwm a’r cynnwrf sy’n ei droi’n Faes.  A gobeithio y bydd pobl yn tyrru yma i Wrecsam gan fod gwledd yn eu haros.

Yn ystod yn cyfnod cyn yr Eisteddfod mae pawb yn gofyn i mi ‘Beth sy gennych chi’n newydd eleni?’  Mewn gwirionedd, mae popeth ar y Maes yn newydd – a dyna yw un o’r pethau gorau amyr Eisteddfod.  Unwaith mae’r wythnos ar ben, dyna ni, rydan ni’n symud ymlaen at y Brifwyl nesaf, gan sicrhau bod yr arlwy’n wahanol ac yn gweddu i’r ardal a dyheadau’r pwyllgorau lleol.  Mae’n bwysig cael blas lleol mewn Eisteddfod,  dyna pam fod Eisteddfod Wrecsam yn mynd i fod yn wahanol iawn i Eisteddfod Blaenau Gwent a Blaenau’r Cymoedd y llynedd, a pham fod honno’n wahanol i Eisteddfod Meirion a’r Cyffiniau ddwy flynedd yn ôl.

Ond mae ‘na rywbeth gwirioneddol newydd eleni, a rydw i’n bersonol yn falch iawn o weld y datblygiad yma – Cefnlen.  Cyfres o weithdai ymarferol ar gyfer unrhyw un sy’n hoff o ysgrifennu yn y Gymraeg yw’r rhain, wedi’u trefnu ar y cyd gennym ni fel Eisteddfod, Barddas a Tŷ Newydd, sy’n rhan o Llenyddiaeth Cymru.  Mae ‘na gymysgedd o ryddiaith a barddoniaeth a rydw i’n gobeithio y byddan nhw’n boblogaidd iawn.  A wyddoch chi lle mae Cefnlen?  Yn nghefn y Babell Lên wrth gwrs!

Mae ‘na newidiadau wedi bod yn y Theatr hefyd.  Rydan ni wedi bod yn gweithio’n agos gyda Theatr Genedlaethol Cymru, ac mae gennym ni adeilad pwrpasol ar gyfer y Theatr a chaffi dros ffordd i’r adeilad erbyn hyn.  Caffi’r Theatrau yw ei enw a dyma’r lle i ddod am wybodaeth am y cynyrchiadau diweddaraf ac i brynu tocynnau ayb.

Ac mae ‘na newidiadau i’r arlwy yn y Theatr hefyd.  Mae ‘na slot newydd eleni – y slot 17.30 – dramau diwedd y p’nawn.  Cyfle i fwynhau drama fer cyn ei throi hi am adref.  Gobeithio y bydd y rhain yn cydio, a  rydan ni hefyd wedi creu slot newydd ar gyfer yr ŵyl ddrama a oedd yn arfer bod gyda’r nos – Gŵyl Ddrama Awr Ginio yw hi rwan – ac mae hyn eisoes wedi cael croeso brwd gan nifer o bobl.  Mae ‘na ragor o wybodaeth am y newidiadau yma yn ein cylchlythyr drama ar ein gwefan – ac yn y Rhaglen Swyddogol wrth gwrs.

Mi fydd gweddill y tîm yn dechrau cyrraedd o yfory ymlaen, felly bydd y lle’n prysuro.  Mae criw y Maes yn tynnu tua therfyn eu gwaith nhw a’r gwaith o addurno a pharatoi popeth ar gyfer yr ymwelwyr yn cychwyn.  Mae nifer o bethau eisoes wedi cyrraedd a’n gobaith yw y bydd y Maes eleni’n fwy lliwgar na’r gorffennol.

Beth bynnag, mi ddo i’n ôl at hyn ymhen ychydig ddyddiau pan ga i funud i ddal i fyny gyda chi!

Hywel Wyn Edwards

Hywel Wyn Edwards sy’n edrych ymlaen at ddechrau’r Eisteddfod Genedlaethol…

Wythnos arall, a’r ffôns hyd yn oed yn brysurach yr wythnos hon na’r wythnos ddiwethaf – a phan dwi’n  mynd adref ar ddiwedd y dydd, dwi’n dal i glywed y ffôn yn canu yn fy nghlustiau!  Ond, mae’n braf clywed cynifer yn ffonio i archebu tocynnau o bob math – o’r cynllun dau am un ar gyfer trigolion ardal Wrecsam i’r cyngherddau nos a’r gwyliau ymylol.

Mae’r  tywydd braf – a lluniau’r Pafiliwn wedi’i godi yn Wrecsam yn gwneud i bobol droi eu golygon tua’r Eisteddfod gan ddechrau edrych ymlaen go iawn am y Brifwyl.  Mae’r amserlenni a’r crynodebau i gyd wedi’u cyhoeddi ar ein gwefan erbyn hyn hefyd, felly mae hyn yn gyfle i bobl ddechrau ar y gwaith o ddewis a dethol beth yn union maen nhw am ei wneud yn ystod yr wythnos -  lle maen nhw am fynd a beth maen nhw am ei weld.

Mae’r tywydd braf hefyd yn berffaith ar gyfer y criw sydd wrthi’n brysur ar y Maes – mae’n llawer brafiach gweithio yn yr haul a’r adeiladau’n cael eu codi’n llawer cyflymach.  Byddwn yn ôl ar y Maes yfory am y tro cyntaf ers rhai dyddiau ac fe fyddwn yn siwr o weld tipyn o newid ers i ni fod yno ganol yr wythnnos ddiwethaf.

Mae bob amser yn gyffrous troi’r gornel i mewn i’r maes parcio bach wrth ymyl swyddfa’r maes yn ystod y cyfnod hwn a gweld yr adeiladau i gyd yn codi fel madarch – a’r Maes yn edrych yn gwbl wahanol o diwrnod i ddiwrnod.

Rydan ni wedi dechrau mynd drwy’r capsiynau rydym wedi’u derbyn fel rhan o gystadleuaeth capsiynau Maes C – dipyn o hwyl a chyfle i ennill tocynnau ar gyfer gweithgareddau’r wythnos.  Mae’r deunyddiau hyrwyddo ychydig yn wahanol eleni, gan ddefnyddio rhai o luniau archif yr Eisteddfod.  Os ydych chi eisiau tro ar y gystadleuaeth, ewch i’r wefan a chlicio ar Maes C – 15 Gorffennaf yw’r dyddiad cau – a gobeithio y byddwn yn derbyn capsiynau sy’n ddigon da i’w defnyddio fel posteri a phanelau yn y Ganolfan Groeso a Maes C yn ystod yr wythnos.

Mae’r rhain i gyd yn clymu i mewn gyda’r dathliadau 150 eleni a chyda’r prosiect atgofion yn arbennig.  Eto, mae rhagor o wybodaeth ar ein gwefan ni am hwn a gallwch rannu’ch atgofion drwy’r we hefyd.

Byddaf yn sôn mwy am hwn cyn bo hir ond yn y cyfamser, dyna’r ffôn a gwell i minnau fynd i’w ateb!

Hywel Wyn Edwards

Hywel Wyn Edwards sy’n dweud ei fod yn braf gweld y gwyrddni dan draed…

Mae’n fis Gorffennaf a dyma fi’n addo dechrau go iawn ar y blogio am yr Eisteddfod eleni.  Mae’r misoedd diwethaf wedi hedfan, ond pan welais i’r Pafiliwn Pinc yn cael ei godi ar Fferm Bers Isaf ddechrau’r wythnos, dyna sylweddoli’i bod hi’n hen bryd i mi ail-ddechrau cyfrannu i hwn.

A beth sydd wedi digwydd dros yr wythnosau diwethaf?  Do, fe godwyd y Pafiliwn, ac fel mae’r llun yn ei ddangos, rydan ni’n dychwelyd i dir gwelltog eleni – i gae go iawn – ac mae’n braf gweld y gwyrddni dan draed.  Mae’r tir mewn cyflwr arbennig o dda, ac rwy’n gobeithio y bydd pawb yn cytuno bod y Maes yn un braf iawn eleni.

Unwaith mae’r Pafiliwn i fyny, mae’r adeiladau eraill yn ymddangos ac yn tyfu fel madarch mewn dim o dro, ac er mod i wedi bod yn gweithio gyda’r Eisteddfod am nifer o flynyddoedd, mae gweld y Pafiliwn Pinc yn cael ei godi yn dal i fod yn brofiad eithaf emosiynol.  Nid yn unig oherwydd ei fod yn golygu bod rhaid i bopeth fod yn barod cyn bo hir, ond hefyd, gan bod cynifer o Gymry’n edrych ymlaen i ddod i’r Eisteddfod – ac mae hyn yn amlwg eto eleni, gyda’r ymateb i godi’r Pafiliwn yn arbennig.  Ond does neb yn edrych ymlaen yn fwy na fi a’r staff – ydi, mae’n wythnos flinedig iawn, ond dyma binacl y flwyddyn i bawb.

Y Pafiliwn Pinc

Mae’r ymateb lleol yn Wrecsam wedi bod yn ardderchog, a dyfal barhad ein gwirfoddolwyr a’n pwyllgorau lleol i godi arian ac ymwybyddiaeth yn anghredadwy.  Dydi hi byth yn hawdd codi arian mewn cyfnod o gynni economaidd, ond mae pobl Wrecsam wedi mynd ati gyda’r fath frwdfrydedd – a syniadau gwreiddiol a cwbl wahanol!  Rydan ni fel staff wedi cael croeso cynnes iawn gan drigolion yr ardal, a chan ein partneriaid fel y Cyngor lleol, sydd wedi bod yn arbennig o gefnogol.

Dros yr wythnosau nesaf byddwn yn mynd ati ymhellach i addurno’r ardal.  Mae pob ysgol yn y dalgylch wedi derbyn fflagiau a phosteri, a rhai ohonyn nhw wedi bod wrthi’n brysur yn addurno o amgylch buarth yr ysgol a’r ystafelloedd dosbarth.  Ddechrau’r wythnos, clywsom y newyddion trist bod fflagiau un o’r ysgolion cynradd wedi’u difrodi, ond erbyn hyn, mae’r disgyblion wedi derbyn rhagor gennym, ac maen nhw’n edrych ymlaen i fynd ati i addurno eto dros y dyddiau nesaf.  Gobeithio wir na fydd y fflagiau yma’n cal eu difrodi.

Mae busnesau lleol hefyd wedi bod yn cysylltu er mwyn derbyn  fflagiau – ac mae teitl yr ymgyrch yn hollol gywir eto eleni – ffoli ar fflagiau – neu mynd yn boncyrs am bynting!  Rydym ni eisoes wedi dosbarthu 10km o fflagiau ac mae rhagor yn ein cyrraedd dros y dyddiau nesaf.  Bydd baneri, fflagiau a phosteri ym mhobman –gobeithio – wrth i’r Eisteddfod agosau, a gresyn nad oes modd i ni fod yn addurno’r priffyrdd tuag at Wrecsam er mwyn dangos y croeso cynnes, ond byddai hyn yn erbyn y gyfraith felly gwell peidio!

Felly, pedair wythnos i fynd – pedair wythnos cyn y cyngerdd agoriadol.  Ydych chi wedi prynu’ch tocynnau eto?  Cofiwch wneud ymlaen llaw – www.eisteddfod.org.uk – neu ffoniwch 0845 4090 800 – ac fe fydda i’n ôl efo rhagor o straeon dros y dyddiau nesaf.

A dyna ni, 1 Mawrth drosodd am flwyddyn arall!  Mae llawer o waith staff yr Eisteddfod yn canolbwyntio ar  y dyddiad hwn wrth i docynnau’r cyngherddau fynd ar werth.

Dyma’r cyfle cyntaf i weld a yw’r arlwy’n debygol o apelio, ac os yw nifer y galwadau ffôn, yr archebion arlein, a phobl yn dod i’r swyddfa i brynu  ddoe yn arwydd o’r hyn i ddod, gallwn groesi bysedd ein bod wedi llwyddo i greu cyfres o gyngherddau a fydd yn apelio at ymwelwyr o bob oed – yn Eisteddfodwyr selog ac ymwelwyr newydd.  Mi oedd hi fel ffair yn y swyddfa!

1 Mawrth yw cychwyn yr ymgyrch fawr i ddenu pobl i’r Eisteddfod.  Dyma pryd mae’r gwaith go iawn o hybu a hyrwyddo gŵyl eleni’n dechrau.  Er ein bod yn gweithio i godi proffil  yr Eisteddfod drwy gydol y flwyddyn, mae pethau’n newid gêr o 1 Mawrth ymlaen.  Ar hyn o bryd, mae 80,000 o lyfrynnau gwybodaeth wrthi’n cael eu dosbarthu ar hyd a lled y wlad, mae posteri newydd yn y wasg a safle docynnau newydd wedi’i lansio ar y we, felly mae popeth mewn lle i’n helpu ni gyda’r gwaith hwn dros y misoedd nesaf.

Brysiwch da chi yw’r neges i unrhyw un sy’n gobeithio cael lle yn y maes carafanau swyddogol.  Ychydig iawn o le sydd ar ôl, a chyda nifer o geisiadau’n dod drwy’r post bob dydd, buan iawn y bydd y safleoedd yma wedi’u llenwi.  Mae’r maes carafanau y drws nesaf i’r Maes ei hun eleni sy’n gyfleus iawn, a chynhelir Maes C yn Ysgol Clywedog – yr hen Ysgol Bryn Offa i’r rheini ohonoch a fagwyd yn yr hen ‘Clwyd’.  Byddwn yn cyhoeddi arlwy Maes C cyn bo hir hefyd – ac mae ‘na nosweithiau go arbennig yn y lein yp eleni, a buan iawn y bydd y tocynnau yna’n cael eu gwerthu – gobeithio!

Ond Eisteddfod symol iawn fyddai hi heb unrhyw gystadlu na seremonїau, felly tra bo’r gwaith cyhoeddus yn parhau i annog pobl i ddod atom, mae’r dyddiadau cau yn dal i gyrraedd ar gyfer cystadleuwyr.  Mae nifer ohonyn nhw wedi pasio erbyn hyn, ac  1 Ebrill yw’r dyddiad mawr nesaf – dyddiad cau y cystadlaethau cyfansoddi.

Ydych chi wedi clywed y si, ‘sgwn i?  Ydych chi wedi clywed bod rhai o feirdd Cymru wrthi’n brysur yn cynganeddu ac yn cyfansoddi mwy nag arfer?  Os ddyweda i 1912 ac 1977, efallai y byddwch yn gwybod am beth ydw i’n sôn.  Mae Eisteddfod Wrecsam yn arbennig i feirdd Cymru – dyma dref y ‘dybl dybl’.

Rydym wedi gweld y ‘dybl’ ychydig o weithiau rwan, sef yr un person yn ennill y Gadair a’r Goron – ond y ‘dybl dybl’?  Dim ond yn Wrecsam y mae hyn wedi digwydd – erioed.  Yn 1912, enillodd T.H. Parry-Williams y Gadair a’r Goron (ac aeth ymlaen i gyflawni’r ‘dybl’ eto ym Mangor dair blynedd yn ddiweddarach), ac yna yn 1977, tro Donald Evans o Dalgarreg oedd hi i sefyll ar ei draed brynhawn Mawrth a Iau i sain yr utgyrn!  Llwyddodd yntau i ailadrodd y gamp dair blynedd yn ddiweddarach yn Nyffryn Lliw yn 1980.

Ond yn ôl at y si eleni.  Maen nhw’n dweud bod rhai o’n beirdd yn bwriadu ymgeisio am y Gadair a’r Goron eleni, gan fod Wrecsam yn Eisteddfod lwcus iawn, ac mae ‘na un neu ddau eisiau creu hanes drwy droi Wrecsam yn dref y ‘trebl’.  Ond mae mis i fynd cyn y dyddiad cau hyd yn oed, ac ar  ôl hynny, mae’n rhaid i’r gwaith apelio at feirniaid y ddwy gystadleuaeth, a byddai’n rhaid i’r awdl a’r bryddest gyrraedd y brig.  Ond pwy â ŵyr!  Bydd rhaid disgwyl tan 5 Awst i weld a fydd Wrecsam yn ennill y trebl ac a fydd un o feirdd Cymru’n ymuno gyda T.H a Donald Evans yn Oriel yr Anfarwolion.

Ac wrth gwrs, pwt arall o newyddion – a nid si mo hon.  Rydan ni newydd gyhoeddi mai Dinbych fydd cartref yr Eisteddfod yn 2013, wrth i ni ddychwelyd i dir Fferm Kilford.  Ond mwy am hynna y tro nesaf!

150 o ddyddiau sydd i fynd tan yr Eisteddfod rwan – dydi o ddim yn amser hir, ac fel pob blwyddyn arall, mae llawer i’w wneud yn ystod y cyfnod byr hwn.  Byddaf yn  blogio’n rheolaidd dros y misoedd nesaf gyda rhai o’r straeon wrth i Wrecsam baratoi ar gyfer y Brifwyl – a chydag un neu ddau o bytiau eraill yma ac acw mae’n siwr!

Hywel Wyn Edwards, trefnydd yr Eisteddfod, sy’n trafod y newidiadau mwyaf i Orsedd y Beirdd ers dyddiau Iolo Morganwg…

Rydan ni wedi cael tipyn o sylw i’r ffaith bod yr Orsedd yn chwilio am Feistres – neu Feistr – newydd i’r Gwisgoedd, dros yr wythnos neu ddwy ddiwethaf.  A thros y dyddiau nesaf, rydan ni’n gobeithio y bydd argymhellion diweddaraf Bwrdd yr Orsedd yn ysgogi trafodaeth.  Mae ‘na newidiadau mawr ar droed os yw cyfarfod cyffredinol yr Orsedd yn eu cytuno yn Wrecsam y flwyddyn nesaf, ac efallai y bydd y gwisgoedd y bydd y Feistr neu’r Feistres newydd yn gyfrifol amdanyn nhw’n eithaf gwahanol erbyn 2012.  Na, dyw’r Orsedd ddim yn cael ‘make-over’ – wel, ddim yng ngwir ystyr y gair, ond fe fydd ‘na newidiadau sylfaenol iawn os yw’r cynlluniau’n cael eu pasio.  Yn wir, dyma’r newidiadau mwyaf i’r Orsedd ers cyfnod Iolo Morganwg ei hun.

Yr wythnos hon, bydd yr Orsedd yn cyhoeddi rhagor o fanylion am yr hyn a drafodwyd yn eu cyfarfod cyffredinol ym Mlaenau Gwent eleni.  Mae Bwrdd yr Orsedd yn awyddus i sicrhau bod pawb yn ymuno â’r Orsedd ar yr un gwastad, gan sicrhau nad oes un lliw’n ymddangos yn fwy pwysig nag unrhyw un arall.  Mae’r cynllun yn dileu dosbarthiad yr Ofydd a Derwydd, a dim ond enillwyr prif gystadlaethau’r Eisteddfod Genedlaethol a’r Urdd fyddai’n derbyn y Wisg Wen, gyda’r wisg honno’n parhau i gynrychioli’r berthynas bwysig sy’n bodoli rhwng yr Orsedd a’r Eisteddfod ei hun.

Ond, dyw’r lliwiau i gyd ddim yn diflannu – ond yn hytrach, byddai’r lliwiau’n cynrychioli gwahanol arbenigedd neu ddoniau, gyda’r posibilrwydd o greu lliw arall yn cael ei drafod, lliw ar gyfer y rheini a urddir yn sgil eu cyfraniad i gymdeithas neu ym myd y campau.  Felly, fydd Meistres neu Feistr y Gwisgoedd ddim yn segur o bellffordd os y bydd y cynnig yma’n cael ei basio.

Ac mae digon o gyfle i drafod.  Mae Bwrdd yr Orsedd yn awyddus i Orseddigion gael cyfle i fynegi barn, ac felly, ni fydd y mater yn cael ei benderfynu’n derfynol tan y cyfarfod cyffredinol ar Faes yr Eisteddfod yn Wrecsam y flwyddyn nesaf, ac os y bydd popeth yn cael ei gytuno bryd hynny, bydd y newidiadau’n dod i rym yn Eisteddfod Bro Morgannwg – ym mro Iolo Morganwg ei hun – y flwyddyn ganlynol.  Felly, os oes gennych chi farn am y newidiadau arfaethedig – mynegwch hi da chi dros y misoedd nesaf.  Gswyliwch allan yn y wasg a’r cyfryngau am wybodaeth am sut i fynegi barn.

Ac wrth gyffwrdd yn fan’na ag Eisteddfod 2012, a gynhelir ym Mro Morgannwg, braf yw nodi ein bod wedi pennu dyddiad ar gyfer cyfarfod cyhoeddus yn yr ardal i ddechrau ar y gwaith paratoi ar gyfer y Brifwyl ymhen dwy flynedd.  A buan iawn y bydd hi’n 2012, credwch chi fi.  Os oes gennych ddiddordeb mewn gwirfoddoli neu fod yn rhan o’r tîm a fydd yn gweithio ar yr Eisteddfod hon, neu os ydych chi’n awyddus i glywed am rai o’r syniadau ar ei chyfer, mae croeso i chi fynychu’r cyfarfod yn Ysgol Gyfun Bro Morgannwg, nos Fercher 6 Hydref am 18.30.  Byddwn yn hyrwyddo’r cyfarfod yma dros yr wythnosau nesaf, a gobeithio’n arw y byddwn yn gweld nifer fawr o bobl yn neuadd yr ysgol ar y noson.

Hen faes awyr Llandŵ ger Y Bontfaen fydd safle’r Eisteddfod a gynhelir o 4 Awst – 11 Awst 2012.  Cofiwch y dyddiadau, a chofiwch hefyd ddod atom i ardal sydd heb fod yn gartref i’r Brifwyl ers 1968 – a chyn hynny, 1920 – felly, mae’n hen bryd ein bod yn dychwelyd i’r Fro.  A gobeithio y bydd y torfeydd a ddaeth atom i Lyn Ebwy eleni, ac a gafodd flas ar yr Eisteddfod yn dychwelyd atom eto i Fro Morgannwg, sy’n gyfleus ar gyfer Caerdydd a rhan helaeth o dde Cymru.  Ond llawer mwy am Fro Morgannwg dros y misoedd wrth i ni ddechrau ar y paratoi – mae Wrecsam i ddod cyn hynny, ac mi fydda i’n sôn mwy am yr hyn sydd ar y gweill yno y tro nesaf.

Hywel Wyn Edwards sy’n dweud hwyl fawr i un Eisteddfod, gan ddechrau edrych ymlaen i’r nesaf…

Wel, fe dynnwyd y Pafiliwn Pinc i lawr ac fe gaeodd y stondinau am flwyddyn arall.  Aeth y Gadair a’r Goron i gartrefi newydd, a chafodd y corau a’r bandiau dipyn o hoe ar ôl yr holl gystadlu.  A hoe oedd hanes staff yr Eisteddfod hefyd, ar ôl i bopeth ddod i ben.  Lle digon unig a thrist yw Maes yr Eisteddfod fore Sul ar ôl i’r cyfan ddod i ben.  Ychydig o lanast sydd ar ôl; y geriach a adawyd ar ôl gan stondinwyr.  Ond mae’r atgofion yn parhau.  Does dim angen y Pafiliwn Pinc i atgoffa pobl Blaenau Gwent a Blaenau’r Cymoedd bod yr Eisteddfod wedi’i chynnal yn yr ardal eleni – er bod nifer wedi bod yn awyddus i’w gadw yno!

Ond mae taith y Pafiliwn Pinc yn parhau, a pharhau hefyd y mae’n taith ninnau.  Yr wythnos nesaf, byddwn yn cerdded y tir yn Fferm Bers Isaf, Wrecsam.  Mae cerdded y tir yn rhan bwysig o’r paratoadau ar gyfer yr Eisteddfod, er mwyn i ni sicrhau ein bod yn adnabod pob modfedd o’r tir, ac y flwyddyn nesaf, byddwn yn dychwelyd at dir amaethyddol.

Dechrau eto y bydd ymarferion y Côr  yn Wrecsam ymhen rhai wythnosau, nos Sul 26 Medi, ac mae ffons y swyddfa eisoes yn brysur gyda phobl eisiau copїau cerddoriaeth er mwyn dechrau ymarfer ar gyfer y flwyddyn nesaf, ac mae nifer fawr eisiau gwybodaeth am garafanio ac am lety yn ardal Wrecsam.  Efallai eich bod yn teimlo bod hyn yn gynnar iawn, ond dydi o ddim mewn gwirionedd.

Wyddoch chi mai dim ond un ar ddeg wythnos a hanner sydd i fynd cyn y dyddiadau cau cyntaf – llai na thri mis!  Mae’n rhaid i bob cais ar gyfer y Fedal Ryddiaith a Gwobr Goffa Daniel Owen ein cyrraedd ni erbyn 1 Rhagfyr.  Felly, os ydych chi am lwyddo fel Grace Roberts neu Jerry Hunter yn Wrecsam y flwyddyn nesaf, gobeithio’n arw eich bod wrthi’n brysur yn ysgrifennu erbyn hyn!

Ac unwaith mae’r dyddiadau cau’n cychwyn, mae’r holl brysurdeb cystadleol yn dychwelyd, gyda’r prosesu, y beirniadu ac yn y blaen yn llenwi oriau staff am fisoedd lawer, a dyw’r gwyliau fis Awst a’r cyfle i asesu a gwerthuso’r Brifwyl ym mis Medi’n ddim ond atgof.

Mae 2011 yn argoeli i fod yn ddiddorol am nifer o resymau.  Nid yn unig mae’r Eisteddfo yn dychwelyd i Wrecsam, tref a fu’n gartref i’r Brifwyl ddiwethaf yn 1977, ond mae’r Eisteddfod ei hun hefyd yn dathlu pen blwydd go arbennig.  Byddwn yn dathlu 150 o flynyddyoedd ar ein ffurf bresennol.  Ar hyn o bryd, rydym wrthi’n brysur yn trefnu’r gweithgaredd a’r ymgyrch i ddathlu, a byddwn yn sicr o rannu’r cyfan yn y blog hwn dros yr wythnosau nesaf.

Mae’n argoeli i fod yn gyffrous, yn uchelgeisiol, ac yn mynd i ychwanegu at naws arbennig Wrecsam a’r Fro.  Eisoes bu peth gwaith paratoi, gyda’r elfen o ddathlu’n rhedeg fel edau drwy destunau Eisteddfod 2011, felly, dros y misoedd nesaf – ac yn enwedig ymhen deg mis a hanner, cawn weld pwy fydd yn dathlu go iawn, pan fydd y golau’n pylu a’r corn gwlad yn atsain drwy’r Pafiliwn.  Ond cyn llwyddo, rhaid cofio anfon y gwaith atom – felly, cofiwch da chi – un ar ddeg wythnos a hanner tan y dyddiad cau cyntaf!

Hywel Wyn Edwards, trefnydd yr Eisteddfod Genedlaethol, sy’n dathlu rhan bwysig o draddodiad yr Eisteddfod…

Efallai i Elfed Roberts sôn y byddai’n falch o weld rhywfaint o law yn disgyn yng Nglyn Ebwy dros yr wythnosau nesaf, ond croesi bysedd am haul ac awyr las roedden ni’n ei wneud ar gyfer Seremoni’r Cyhoeddi, a gynhaliwyd yn Wrecsam ddydd Sadwrn.

A diolch i’r drefn, haul a gawsom, gyda thywydd bendigedig – a ddim yn rhy boeth – drwy’r dydd.  Tywydd Cyhoeddi perffaith.  Mae’n syndod faint o waith yw trefnu’r  Cyhoeddi – yn enwedig dros y blynyddoedd diwethaf wrth i’r elfen o hwyl a gŵyl ddatblygu.  A chredwch chi fi, dydi hi ddim yn hawdd trefnu gorymdaith a sicrhau bod pawb yn eistedd yn y cadeiriau cywir am seremoni gyfan!

Ond mae’r Cyhoeddi’n rhan bwysig o draddodiad yr Eisteddfod, ac yn gyfle i ni ddathlu’r ffaith bod y Brifwyl yn ymweld ag ardal benodol y flwyddyn nesaf.  Mae’n ffordd dda o ennyn diddordeb a chael y rheini sy’n frwdfrydig i ddod atom i wirfoddoli fel mae hi’n prysuro tua’r hydref a thros y gaeaf.

Roedd gwirfoddolwyr Wrecsam yn wych, yn stiwardio, helpu ar y stondinau, yn gwerthu’r Rhestr Testunau o gwmpas Cylch yr Orsedd, ac yn sicrhau bod gan yr Orsedd baned a bod eu penwisgoedd yn syth cyn iddyn nhw ddechrau ar yr Orymdaith.  Byddai’n anodd iawn trefnu seremoni o’r fath heb gymorth ein gwirfoddolwyr, felly hoffwn ddiolch o waelod calon i chwi oll am eich cymorth a’ch cefnogaeth ddi-flino.

Un o’r elfennau pwysicaf – a mwyaf poblogaidd os yw’r prysurdeb ar ein stondinau ddiwedd y prynhawn yn arwydd o unrhyw beth – sy’n digwydd adeg y Cyhoeddi yw lansio’r Rhestr Testunau, ac yn wir, roedd pobl yn heidio i’r stondin ger Swyddfeydd y Cyngor, yn lenorion, beirdd, cerddorion ac yn aelodau o’r cyhoedd, i gyd eisiau prynu copi o rywbeth a lansiwyd mewn digwyddiad mor hynod.  Fe werthwyd nifer fawr o gopїau ac erbyn heddiw, bydd wedi cyrraedd siopau ar hyd a lled Cymru ac mae modd ei brynu hefyd ar ein gwefan – www.eisteddfod.org.uk. Gobeithio’n arw y bydd ei gynnwys yn apelio atoch i gyd, ac rwy’n siwr y cawn gyfle i sôn am ambell destun a chystadleuaeth dros y misoedd nesaf, wrth i Eisteddfod Wrecsam a’r Fro agosau.

Ond am y tro, rydym ni’n troi’n golygon yn ôl i’r de ddwyrain ac i Flaenau Gwent a Blaenau’r Cymoedd.  Ymhen pythefnos, fe fydda i’n dechrau gweithio’n y swyddfa ar y Maes, ychydig ddyddiau cyn i’r rhan fwyaf o staff eraill y swyddfa gyrraedd, ac mae hyn yn rhoi cyfle i mi gael trefn ar bethau ac i asesu popeth ar y Maes ac yn y swyddfa cyn i bawb arall gyrraedd ac i’r Eisteddfod i gyd symud i Flaenau Gwent.

Un datblygiad cyffrous ar gyfer eleni yw’r iSteddfod, sef ‘app’ ar gyfer yr  iphone neu’r ipod Touch, a fydd yn sicr o apelio at ein hymwelwyr a’n cynulleidfa.  Mae’n wasanaeth heb ei ail sydd wedi’i ddatblygu gan ddau ŵr ifanc, sy’n galw’u hunain yn FiaFo.  Bwriad yr app yw cynnig gwybodaeth am weithgareddau o bob math ar y Maes, a rhoi gwybodaeth am leoliad stondinau – yn wir – unrhywbeth y byddwch ei angen, ac y bydd hyn i gyd ar gael yn eich iphone.  Tipyn o ‘app’ a thipyn o wasanaeth i’r rheini ohonoch sy’n ymwneud ac yn mwynhau’r math yma o beth.  Dwi’n siwr y byddwn yn trafod mwy ar hyn cyn i’r Eisteddfod agor ei giatiau.

Ond fe fydd y rheini ohonoch sydd heb gyrraedd yr  uchel-leoedd technolegol ynsicr o fod yn  falch o glywed y bydd y Rhaglen Swyddogol ar gael erbyn diwedd yr wythnos, ac fe fydd ‘highlighters’ yn cael eu defnyddio ym mhob cwr o Gymru dros y penwythnos, wrth i Eisteddfodwyr selog fynd ati i gynllunio a rhoi trefn ar eu hwythnos, gan baratoi ar gyfer Eisteddfod Blaenau Gwent a Blaenau’r Cymoedd.

Hywel Wyn Edwards, trefnydd yr Eisteddfod Genedlaethol, sy’n edrych ar y gwaith o godi arian a hyrwyddo Eisteddfod Genedlaethol Blaenau Gwent…

Mae Wythnos Addysg i Oedolion 2010 yn dechrau yfory, wythnos bwysig i hyrwyddo cyfleoedd addysg i bawb o bob oed, rhoi cyfle i bobl ddysgu sgiliau newydd ac i ail-gynnau diddordeb mewn pynciau o bob math.

Y penwythnos diwethaf roedd rhai o’r tîm yn Ysgol Glyncoed, Glyn Ebwy, i ddewis pedwar cystadleuydd ar gyfer rownd derfynol Dysgwr y Flwyddyn.  Fel arfer roedd y safon yn eithriadol o uchel, ac fel arfer roedd cynulleidfa arbennig o dda wedi dod i gefnogi’r ymgeiswyr, ond eleni, roedd mwy o gyffro nac arfer – roedd pawb wrth eu boddau bod cynifer wedi cystadlu – naw ar hugain o bobl – y nifer mwyaf erioed!

Roedd y naw ar hugain yn dod o bob math o gefndiroedd,  ac i gyd gyda rhesymau gwahanol a phersonol dros fynd ati i ddysgu’r Gymraeg.  Bwriad dydd Sadwrn oedd rhoi cyfle i’r beirniaid gael sgwrs gyda phawb ac yna, yn y prynhawn, i’r rhai ar y rhestr fer gael cyfweliad ar gyfer y rownd derfynol.  Yn ôl y sôn, roeddan nhw’n ardderchog, ac ar ddyddiau fel yna, rwy’n falch iawn mai trefnu’r Eisteddfod y bydda i, a nid gorfod dewis enillydd neu fuddugwyr!

Ac fe fum yn meddwl wedyn am y gystadleuaeth hon a pha mor bwysig yw gwobrwyo a chefnogi’r rheini sy’n mynd ati i ddysgu’r iaith.  Un o amcanion yr Eisteddfod Genedlaethol yw annog pobl i fynd ati i ddysgu Cymraeg ac i gymryd diddordeb yn yr iaith a’n diwylliant, ac mae’n gyfrifoldeb bwysig iawn, yn enwedig mewn ardal fel Blaenau Gwent.  Roeddwn yn meddwl eto am eiriau Cadeirydd y Pwyllgor Gwaith, Richard Davies, pan apeliodd am gefnogaeth pobl Cymru, gan ddweud:

“Dyma ein Eisteddfod ni.  Dyma’n cyfle ni fel siaradwyr Cymraeg, dysgwyr yr iaith a’i chefnogwyr lu i greu cyfleoedd diwylliannol ac ieithyddol i’n cymunedau lleol.  Mae’n gyfrifoldeb arnom oll i gofleidio’r gefnogaeth yma at yr iaith, ac i sicrhau bod yr Eisteddfod eleni yn tanio dychymyg y rhain a phawb arall yng  Nghymru.”

Mae geiriau Richard – un a fagwyd yn lleol, a sydd erbyn hyn yn dysgu mewn ysgol Gymraeg yn y dalgylch – yn bwysig, nid yn unig i ardal yr Eisteddfod, ond i Gymru gyfan, ac mae o’n iawn i ddweud bod cyfrifoldeb arnom ni oll i groesawu – i gofleidio hyd yn oed – y gefnogaeth yma at y Gymraeg a’r rheini sy’n mynd ati i ddysgu’r iaith.  Nid pawb fydd yn cyrraedd y brig yng nghystadleuaeth Dysgwr y Flwyddyn, ond mae dysgu’r iaith yn sicr o newid bywyd pob un.

Mae rhoi cyfleoedd – a thrwy hynny addysg gydol oes – yn rhan greiddiol o ethos yr Eisteddfod Genedlaethol. Mae holl ymwneud y sefydliad gyda’r rheini sy’n gwirfoddoli ar ein pwyllgorau am fisoedd lawer yn cynnig cyfleoedd newydd i bobl.  Mae’n debyg mai’r pwyllgorau apel lleol yw’r enghreifftiau gorau o hyn – mae croeso i unrhyw un ymuno – ac o’r pwyllgorau hyn ar lawr gwlad y daw rhai o’r syniadau mwyaf gwreiddiol a hwyliog am sut i godi arian.

Cawsom alwad yn y swyddfa ddoe, yn gofyn am gymorth i gynhyrchu posteri hyrwyddo ar gyfer rasus hwyaid a hyrddod – ie, hyrddod – i godi arian ar gyfer yr Eisteddfod – a dyna bennawd – Hyrddod yn hyrwyddo’r ‘Steddfod!   Pa sefydliad arall sy’n rhoi cyfle i bobl leol ddod at ei gilydd i drafod a phenderfynu – mewn awyrgylch pwyllgor – y math yma o bethau?  Mae’n amlwg mai dyma ddigwyddodd yn y un o gyfarfodydd diweddar Pwyllgor Apel Dyffryn Ceiriog, ac fe fydd na bosteri hyrwyddo’n eu cyrraedd yn fuan iawn.  17.30 ar 4 Mehefin ar dir Ddol Penbryn, Llanarmon yw’r manylion gyda llaw, rhag ofn eich bod chi am alw draw!

A beth ond cyfle addysg gydol oes yw sefydlu côr yr Eisteddfod?  Bydd nifer o’r aelodau eisoes yn canu mewn gwahanol gorau’n lleol, ond mae croeso i unrhyw un ymuno â’r côr.  Unrhyw un sy’n mwynhau canu ac eisiau’r her o ddysgu darn o waith cerddorol a pherfformio ar lwyfan gydag unawdwyr o safon byd eang.  Buan iawn y daw taith – swyddogol o leiaf – Côr Blaenau Gwent a Blaenau’r Cymoedd i ben, pan fydd y côr yn canu Requiem hyfryd Mozart yn D leiaf ar lwyfan y Pafiliwn gyda Jason Howard, Wynne Evans, Leah-Marian Jones ac Iona Jones, gydag Alun Guy’n arwain, nos Fawrth 3 Awst.  Ond yr wythnos nesaf, cychwyn fydd taith Côr Wrecsam a’r Fro 2011, nos Sul 23 Mai yng Nghapel y Groes, Wrecsam am 19.30, gydag Ann Atkinson yn arwain.

Peth fel hyn yw Eisteddfod.  Fel mae taith gyhoeddus neu gyfnod un yn dod i ben, mae’r gweithgareddau ar gyfer yr un canlynol yn cynyddu a’r gwaith jyglo’n mynd yn ei flaen – gan y byddwn yn gweithio ar dair neu bedair Eisteddfod ar unwaith weithiau.  Ac yn aml, dydw i ddim yn meddwl bod pobl yn sylweddoli cymaint o waith sy’n digwydd yn lleol dros gyfnod mor hir, gyda chymaint o bobl yn rhan o’r paratoi, y codi arian a’r gwaith hyrwyddo – a’r cyfan oll yn gyfle i ddefnyddio a dysgu Cymraeg, yn gyfle i ddysgu a defnyddio sgiliau newydd, ac yn gyfle i roi ffocws clir a phendant i wahanol gymunedau.

Ac yn olaf – rydan ni newydd glywed mai Only Men Aloud enillodd wobr albwm y flwyddyn yng ngwobrau’r Brits Clasurol neithiwr – gan guro’r Pab!  Llongyfarchiadau mawr i Tim a’r bechgyn.  Maen nhw’n hynod dalentog ond hefyd yn ysbrydoliaeth i gynifer o gorau ac unigolion.  Mae’r ymgyrch Only Boys Aloud yn y Cymoedd ar hyn o bryd yn ardderchog, ac yn sicr o roi hwb i’r byd corawl yng Nghymru.  Ac wrth gwrs , y nhw sy’n agor yr Eisteddfod nos Wener 30 Gorffennaf eleni.  Llongyfarchiadau lu – a chofiwch, dewch i’w gweld!

Hywel Wyn Edwards, trefnydd yr Eisteddfod Genedlaethol, sy’n trafod canlyniadau pleidlais cyngerdd Clasur o Noson.

Gyda phawb ar hyd a lled y wlad yn mynd ati i bleidleisio heddiw, cyfri’r pleidleisiau oedd ein gwaith ni echdoe, wrth i ni fynd drwy’r dwy fil a mwy o bleidleisiau a dderbyniwyd ar gyfer y cyngerdd Clasur o Noson.

Yn debyg iawn i’r polau piniwn dros y mis diwethaf, roedd tipyn o gystadlu – a cheffylau blaen mewn gwahanol gategorїau’n newid o ddydd i ddydd.  Piti garw nad oedd gennym ninnau ‘swingometer’ crand yn y swyddfa o dro i dro wrth i’r pleidleisiau ein cyrraedd.  Ond yn wahanol efallai i ganlyniad heddiw, fe gafwyd enillwyr clir, a digon hawdd yn y pendraw oedd penderfynu ar rediad y cyngerdd, a gynhelir ar 5 Awst.

Efallai na fu llygaid y byd ar y bleidlais hon dros yr wythnosau diwethaf, ond rydym ni’n ddiolchgar iawn i bawb a gymerodd ran yn y pleidleisio, trwy’r post, arlein ac mewn cymdeithasau a gweithgareddau lleol ar hyd a lled Cymru.  Diolch hefyd i’r sylw a gafwyd gan y wasg a’r cyfryngau.

Fe allwn i roi’r ystadegau, y canrannau a llond lle o wybodaeth am y pleidleisio, ond mae’n siwr ein bod ni oll wedi gweld cymaint o ffigurau’n dawnsio o flaen ein llygaid dros yr wythnosau diwethaf fel ei fod yn llawer haws cyflwyno’r wybodaeth fel rhestr hen ffasiwn, syml heb unrhyw ‘spin’ yn perthyn iddo!

• Categori Corawl: Sadoc Ŵr Duw (Handel), Corws yr Haleliwia (Handel) ac Emyn y Pasg (Mascagni).
• Categori Opera: Deuawd y Pysgotwyr Perl (Bizet), Grand March, Aida  ( Verdi)  a Votre Toast: Cân y Toreador, Carmen (Bizet)
• Categori Cyfansoddwyr Cymreig: Tydi a Roddaist (Arwel Hughes), Suo Gân (trefniant George Wheldon), Hywel a Blodwen (Joseph Parry), Palladio (Karl Jenkins)
• Categori Cerddorfaol: Nimrod, Enigma Variations (Elgar), Finlandia (Sibelius)
• Categori Cerddoriaeth Boblogaidd : Schindler’s List (John Williams), Hymn to the Fallen (John Williams), Medli o Ffilmiau James Bond

Wrth ail-ddarllen y canlyniadau hyn, efallai nad yw’r pleidleisio wedi bod mor wahanol i’r hyn a geir heddiw wedi’r cyfan – dim un cyfansoddwr yn dod yn brig, ond yn hytrach, dau waith yr un gan Handel, John Williams a Bizet yn cael eu dewis, a rhai o’r ceffylau blaen cynharaf fel Mozart a Beethoven yn  methu ennill tir ar y munud olaf.

Dydw i ddim am geisio dadansoddi unrhyw beth ymhellach, ond gallaf eich sicrhau am un peth – bydd hwn yn gyngerdd a hanner!  Rydan ni eisoes yn trafod un neu ddau o berfformiadau ychydig yn wahanol, ac yn cysylltu â gwahanol unawdwyr ar hyn o bryd. Mae’r tocynnau ar werth rŵan, ac mae gwybodaeth ar wefan yr Eisteddfod.

Cofiwch hefyd bod cystadleuaeth Dysgwr y Flwyddyn yn dechrau poethi dydd Sadwrn, pan fyddwn yn cael gwybod pwy fydd y pedwar yn y rownd derfynol eleni, ar ôl diwrnod o gystadlu brwd.  Mae croeso i unrhyw un alw draw i Ysgol Glyncoed yng Nglyn Ebwy o 10.00 ddydd Sadwrn i gefnogi’r naw ymgeisydd ar hugain sydd wedi cystadlu eleni – nifer ardderchog – a chawn wybod ar ddiwedd y dydd pwy fydd wedi llwyddo – cyn i ni wybod yn sicr pwy fydd yn llwyddo a beth fydd gwir ganlyniad y pleidleisio heddiw, efallai…

Ar nodyn cwbl wahanol, cyhoeddir cylchlythyr Eisteddfod Wrecsam a’r Fro heddiw, gyda llond lle o newyddion a gwybodaeth am y paratoadau ar gyfer Eisteddfod 2011, ac yfory, gobeithio, byddwn yn cyhoeddi’r rhifyn diweddaraf o gylchlythyr Blaenau Gwent a Blaenau’r Cymoedd, sydd wedi bod yn llwyddiant mawr, ac yn cael ei anfon at dros 12,000 o unigolion yn rheolaidd drwy ebost erbyn hyn.  Ffordd cost-effeithiol – ac effeithiol – o gadw mewn cysylltiad gyda’n cefnogwyr.  Os nad ydych chi’n derbyn copi, cysylltwch drwy gofrestru arlein neu drwy anfon ebost at gwyb@eisteddfod.org.uk.

Gyda phawb ar hyd a lled y wlad yn mynd ati i bleidleisio heddiw, cyfri’r pleidleisiau oedd ein gwaith ni echdoe, wrth i ni fynd drwy’r dwy fil a mwy o bleidleisiau a dderbyniwyd ar gyfer y cyngerdd Clasur o Noson.

Yn debyg iawn i’r polau piniwn dros y mis diwethaf, roedd tipyn o gystadlu – a cheffylau blaen mewn gwahanol gategorїau’n newid o ddydd i ddydd.  Piti garw nad oedd gennym ninnau ‘swingometer’ crand yn y swyddfa o dro i dro wrth i’r pleidleisiau ein cyrraedd.  Ond yn wahanol efallai i ganlyniad heddiw, fe gafwyd enillwyr clir, a digon hawdd yn y pendraw oedd penderfynu ar rediad y cyngerdd, a gynhelir ar 5 Awst.

Efallai na fu llygaid y byd ar y bleidlais hon dros yr wythnosau diwethaf, ond rydym ni’n ddiolchgar iawn i bawb a gymerodd ran yn y pleidleisio, trwy’r post, arlein ac mewn cymdeithasau a gweithgareddau lleol ar hyd a lled Cymru.  Diolch hefyd i’r sylw a gafwyd gan y wasg a’r cyfryngau.

Fe allwn i roi’r ystadegau, y canrannau a llond lle o wybodaeth am y pleidleisio, ond mae’n siwr ein bod ni oll wedi gweld cymaint o ffigurau’n dawnsio o flaen ein llygaid dros yr wythnosau diwethaf fel ei fod yn llawer haws cyflwyno’r wybodaeth fel rhestr hen ffasiwn, syml heb unrhyw ‘spin’ yn perthyn iddo!

• Categori Corawl: Sadoc Ŵr Duw (Handel), Corws yr Haleliwia (Handel) ac Emyn y Pasg (Mascagni).
• Categori Opera: Deuawd y Pysgotwyr Perl (Bizet), Grand March, Aida  ( Verdi)  a Votre Toast: Cân y Toreador, Carmen (Bizet)
• Categori Cyfansoddwyr Cymreig: Tydi a Roddaist (Arwel Hughes), Suo Gân (trefniant George Wheldon), Hywel a Blodwen (Joseph Parry), Palladio (Karl Jenkins)
• Categori Cerddorfaol: Nimrod, Enigma Variations (Elgar), Finlandia (Sibelius)
• Categori Cerddoriaeth Boblogaidd : Schindler’s List (John Williams), Hymn to the Fallen (John Williams), Medli o Ffilmiau James Bond

Wrth ail-ddarllen y canlyniadau hyn, efallai nad yw’r pleidleisio wedi bod mor wahanol i’r hyn a geir heddiw wedi’r cyfan – dim un cyfansoddwr yn dod yn brig, ond yn hytrach, dau waith yr un gan Handel, John Williams a Bizet yn cael eu dewis, a rhai o’r ceffylau blaen cynharaf fel Mozart a Beethoven yn  methu ennill tir ar y munud olaf.

Dydw i ddim am geisio dadansoddi unrhyw beth ymhellach, ond gallaf eich sicrhau am un peth – bydd hwn yn gyngerdd a hanner!  Rydan ni eisoes yn trafod un neu ddau o berfformiadau ychydig yn wahanol, ac yn cysylltu â gwahanol unawdwyr ar hyn o bryd. Mae’r tocynnau ar werth rŵan, ac mae gwybodaeth ar wefan yr Eisteddfod.

Cofiwch hefyd bod cystadleuaeth Dysgwr y Flwyddyn yn dechrau poethi dydd Sadwrn, pan fyddwn yn cael gwybod pwy fydd y pedwar yn y rownd derfynol eleni, ar ôl diwrnod o gystadlu brwd.  Mae croeso i unrhyw un alw draw i Ysgol Glyncoed yng Nglyn Ebwy o 10.00 ddydd Sadwrn i gefnogi’r naw ymgeisydd ar hugain sydd wedi cystadlu eleni – nifer ardderchog – a chawn wybod ar ddiwedd y dydd pwy fydd wedi llwyddo – cyn i ni wybod yn sicr pwy fydd yn llwyddo a beth fydd gwir ganlyniad y pleidleisio heddiw, efallai…

Ar nodyn cwbl wahanol, cyhoeddir cylchlythyr Eisteddfod Wrecsam a’r Fro heddiw, gyda llond lle o newyddion a gwybodaeth am y paratoadau ar gyfer Eisteddfod 2011, ac yfory, gobeithio, byddwn yn cyhoeddi’r rhifyn diweddaraf o gylchlythyr Blaenau Gwent a Blaenau’r Cymoedd, sydd wedi bod yn llwyddiant mawr, ac yn cael ei anfon at dros 12,000 o unigolion yn rheolaidd drwy ebost erbyn hyn.  Ffordd cost-effeithiol – ac effeithiol – o gadw mewn cysylltiad gyda’n cefnogwyr.  Os nad ydych chi’n derbyn copi, cysylltwch drwy gofrestru arlein neu drwy anfon ebost at gwyb@eisteddfod.org.uk.