Gareth Bale mewn crys hyfforddi Cymru!
Owain Schiavone sy’n trafod y cecru sydd wedi ailgydio ynglŷn a’r tîm pêl-droed Prydeinig yn y Gemau Olympaidd blwyddyn nesaf.

Wythnos diwethaf fe ryddhawyd lluniau o seren tîm pêl-droed Cymru, Gareth Bale, yn gwisgo crys pêl-droed Prydain ar gyfer Gemau Olympaidd Llundain 2012.

Dim ond crys cefnogwyr oedd hwn gan gwmni Adidas, yn hytrach na’r crys fydd yn cael ei ddefnyddio gan y tîm yr haf nesaf – bydd hwn yn cael ei ryddhau rhywdro yn y flwyddyn newydd mae’n debyg.

Er hynny, mae wedi bod yn ddigon i gorddi’r dyfroedd unwaith eto ynglŷn â’r ddadl dros ac yn erbyn cael tîm pêl-droed Prydeinig yn y gemau blwyddyn nesaf.

Yn y gornel goch…

Mae Cymdeithasau pêl-droed Cymru, Yr Alban ac Iwerddon wedi datgan yn glir eu bod yn erbyn yr egwyddor, ac mae llywydd y Gymdeithas Gymreig, Phil Pritchard wedi ategu hynny ers i’r llun o Bale ymddangos, gan ddatgan ei siom am y llun hefyd.

Mae tipyn o anghytuno am y mater ymysg cefnogwyr Cymru hefyd. Mae ymddangosiad y llun wedi arwain at drydar gwyllt tra bod rhaid i Dylan Jones ymdebygu i ddyfarnwr bocsio wrth i’r sylwebyddion Gary Pritchard ac Iwan Arwel ddadlau am y peth ar raglen Ar y Marc fore Sadwrn.

Yn bersonol, dwi’n deall uchelgais chwaraewyr gwych fel Bale ac Aaron Ramsey i chwarae ar y lefel uchaf o bêl-droed – wrth gwrs fy mod i, mae unrhyw chwaraewr eisiau cyrraedd y lefel uchaf posib.

Beth dwi’n methu ei ddeall ydy pam yn y byd felly fydden nhw eisiau gwastraff eu hamser yn cymryd rhan yn nhwrnament bêl-droed y Gemau Olympaidd!?

Digwyddiad ymylol iawn ydy’r gystadleuaeth bêl-droed yn y Gemau Olympaidd- y trac athletau ydy prif ffocws y gemau, tra bod i felodrôm seiclo a’r pwll nofio hefyd yn uchafbwyntiau i’r rhan fwyaf.

Dwi’n foi ffwtbol, ond fedra i’n onest ddim dweud wrthoch chi pwy enillodd aur ar y maes pêl-droed yn Beijing yn 2008.

Wedi dweud hynny, dwi’n cofio fod Usain Bolt wedi dod cipio sylw’r byd ar y trac, dwi’n cofio gorchestion Chris Hoy yn y felodrôm…a dwi hyd yn oed yn cofio enw Michael Phelps fel yr un a greodd y penawdau yn y pwll nofio!

Uchelfan pêl-droed? Dim gobaith

Tydi’r pêl-droed jyst ddim yn bwysig yng nghyd destun y Gemau Olympaidd, a’r hyn sy’n fy siomi braidd gan Bale a Ramsey ydy eu diffyg uchelgais trwy roi gymaint o bwyslais ar fod eisiau cymryd rhan.

Nid yw’r Gemau Olympaidd yn agos at fod yn un o uchafbwyntiau’r byd pêl-droed – Cwpan y Byd, Pencampwriaethau Ewrop a Chynghrair y Pencampwyr ydy’r lefel uchaf y dylai chwaraewyr ifanc Cymru dargedu.

Mae Bale a Ramsey wedi bod yn ddigon lwcus i gystadlu yng Nghynghrair y Pencampwyr yn barod – dylen nhw fod yn canolbwyntion felly ar gyrraedd y ddwy gystadleuaeth arall uchod, a dim ond gyda Chymru maen nhw’n gallu cyflawni hynny.

I bob pwrpas, cystadleuaeth ieuenctid ydy’r gystadleuaeth bêl-droed yn y Gemau Olympaidd – twrnament bach i chwaraewyr dan-23 gydag ambell hen stejar wedi eu taflu mewn.

Yn ogystal â’r tri cystadleuaeth dwi eisoes wedi’i nodi, mae Uwch Gynghrair Lloegr yn lwyfan pwysicach i bêl-droediwr na’r Gemau Olympaidd.

Bydd gêm bêl-droed olaf y Gemau Olympaidd yn cael ei chwarae ar 11 Awst – wythnos cyn i gemau’r Uwch Gynghrair ddechrau. Dwi’n synnu’n fawr nad yw’r rhan fwyaf o reolwr yr Uwch Gynghrair wedi mynegi pryder am hyn, yn yr un modd ag y mae Malky Mackay o Gaerdydd wedi gwneud.

Un peth ddywedodd Gary Pritchard ar Ar y Marc, oedd fod hyn y gyd yn ‘PR gwych’…a do’n i heb ystyried hynny’n iawn ynghynt.

Heb os mae’r holl drafod a dadlau’n codi proffil y gystadleuaeth bêl-droed yn y Gemau Olympaidd, a bydd hynny’n hwb i werthiant tocynnau mae’n siŵr.

Mae’n dod yn fwy fwy amlwg mai stunt PR glyfer ydy’r holl fater a fod trefnwyr Llundain 2012 am i’r trafod a dadlau barhau. Fel arall, petai nhw wir am geisio meddalu rhywfaint ar agwedd y gwledydd Celtaidd a’u cefnogwyr, does bosib na fydden nhw wedi penodi’r Sais, Stuart Pearce i reoli’r tîm gan droi at y Gwyddel Martin O’Neill neu’r Cymru Mark Hughes yn ei le?

Tommie Collins yn pwyso a mesur seren fawr newydd pêl-droed Cymru.

Roedd gwylio Bale wrthi eto yn dangos pwy oedd y bos yn erbyn Innter Milan yn dod ag atgofion yn ôl o’r tro cyntaf imi gwrdd ag o. San  Sebastian (Donastia) 20 Mai 2006 – pen mawr a sâl fel ci.

Dyna pryd wnes i drefnu gwesty ar gyfer gêm Cymru yng Ngwlad y Basg a sioc oedd sylweddoli fod carfan Cymru yn aros yn yr un lle! Ni’n griw o  ddynion wedi meddwi a’r bachgen tenau tal ac ifanc yn edrych yn hurt atom. Prin edrych arno eilwaith wnaeth y rhan fwyaf. Ie y tro cyntaf i gwrdd â Gareth Bale.

Wnaeth o ddim chwarae yn Bilbao – yn Gratz yr wythnos wedyn y cafodd ei gap cyntaf, pan roedd Cymru yn herio Trinidad & Tobago mewn gêm gyfeillgar. Enillodd Cymru o ddwy gôl i un, a Bale yn creu’r gôl fuddugol i Earnie.

Roedd y wasg o Loegr yn bresennol oherwydd bod T & T yn wrthwynebwyr i’r Saeson yng Nghwpan y Byd mis wedyn. Tybed wnaethon nhw feddwl y byddai amser pan fydden nhw’n meddwl, ‘bechod fod o ddim yn Sais!’.

Ar ôl  curo Inter neithiwr a Bale yn disgleirio dyna be mae’r wasg yn ei ddweud. A ddylen ni fod yn falch?  Sefyllfa Giggs eto?

Mae cenfigen yn sobor o beth. Ydy Ashley Cole yn well chwaraewr? Mae gêm amddiffyn Bale yn wael ar adegau.

O dan arweinyddiaeth Tosh, mae wedi chwarae yn eithaf da, serch hynny mewn tîm gwael ar adegau, ond dw i’n meddwl weithiau ei fod fel Giggs, yn ymdrechu gormod ei hun.

Pan fydd Ramsey a Collison yn ôl, dw i’n siŵr y gwneith pethe wellau i Gymru. Ond ydy Cymdeithas Pêl Droed Cymru yn manteisio ar Bale ai’ farchnata?

Chwarae teg, yng Nghymru roedd o wythnos diwethaf yn chwarae golff gyda’i ffrindiau, ddim yn meddwi yn rhywle a chamymddwyn. Dydi o ddim yn yfed alcohol o gwbl wrth gwrs, arwydd clir o’r proffesinoldeb a’r penderfyniad sydd ganddo ac sydd wedi ei alluogi i gyrraedd yr uchelfannau hyd yma y tymor hwn.

Oes, mae gan Gymru seren ar ei dwylo. Mae’r mab a’i ffrindiau yn ei addoli, a braf oedd gweld nad Drogba, Torres a Rooney oedd y sgwrs ar Facebook neithiwr.

Owain Schiavone sy’n awgrymu fod gan John Toshack rai pethau i deimlo’n gadarnhaol ynglŷn a nhw ar hyn o bryd…

Ar un olwg, does gan gefnogwyr tîm pêl-droed cenedlaethol Cymru fawr ddim i deimlo’n gadarnhaol ynglŷn ag o wrth edrych ymlaen at gemau rhagbrofol Ewro 2012 yn yr Hydref. Wrth i hyder y selogion ddechrau codi yn dilyn canlyniad gwych yn erbyn yr Albanwyr, fe gollwyd ein chwaraewr gorau, Aaron Ramsey,i anaf creulon. Roedd hyn yn glec enfawr i gynlluniau John Toshack gan ei fod heb amheuaeth yn bwriadu adeiladu’r tîm o amgylch creadigrwydd y seren ifanc. Does dim sicrwydd pryd y bydd Ramsey yn ôl ar y cae, na chwaith os bydd o’n dychwelyd yn gystal chwaraewr. Does ‘na ddim argoel chwaith bod Toshack yn debygol o lyncu ei falchder a cheisio perswadio Ryan Giggs i ddychwelyd i helpu’r achos yn dilyn sylwadau gan Giggs yn y Western Mail. Ramsey neu beidio, byddai cael profiad Giggs nôl yn y garfan yn hwb enfawr i’r dreigiau ifanc.

Mae’n ymddangos taw ymgyrch ddiflas arall sydd o’n blaen ni’r tro yma eto…neu oes yna un fflach o obaith i Toshack? Mae Gareth Bale wedi cael wythnos anhygoel gyda’i dîm, Tottenham Hotspur. Nos Fercher, fe sgoriodd Bale y gôl fuddugol yn y ddarbi Gogledd Llundain yn erbyn Arsenal, gan sicrhau buddugoliaeth gynghrair gyntaf Spurs yn erbyn eu cymdogion ers 1999. Mae hyn yn rhoi Spurs mewn safle da i orffen yn bedwerydd yn y gynghrair, a sicrhau lle gwerthfawr yng Nghynghrair y Pencampwyr tymor nesaf. Cryfhawyd eu hachos ymhellach ddydd Sadwrn gyda buddugoliaeth yn erbyn un arall o dimau Llundain, Chelsea, ac unwaith eto, Bale, oedd yr arwr wrth iddo sgorio ail gôl ei dîm gydag ergyd troed dde. Yn wir, Bale oedd chwaraewr mwyaf dylanwadol Spurs ac roedd ei rediadau lawr yr asgell chwith yn fygythiad cyson i amddiffyn Chelsea – un o’r rhediadau hynny arweiniodd at drosedd sinigaidd gan, John Terry, a arweiniodd at gerdyn coch i gyn gapten Lloegr.

Mae’r trawsnewidiad yn Bale ers ddechrau’r flwyddyn wedi bod yn eithriadol. Cyn hynny, roedd ei yrfa yng ngogledd Llundain yn y fantol, gyda’i rheolwr, Harry Redknapp yn ffafrio’r chwaraewr cyffredin iawn Benoît Assou-Ekotto yn safle’r cefnwr chwith. Doedd y ffaith nad oedd Spurs wedi ennill gêm gyda Bale yn yr XI cyntaf ddim yn helpu ei achos chwaith. Ond, ers iddo adennill ei le yn y tîm ym mis Ionawr mae wedi troi cornel go iawn gan roi perfformiadau cyson a phrofi fod ganddo’r potensial i fod yn chwaraewr ochr chwith gorau’r gynghrair…os nad y byd, chwedl Harry Redknapp yn dilyn gêm Arsenal. Y cur pen mwyaf i Toshack fydd pa safle i chwarae Bale gan mae cefnwr chwith ydy o’n swyddogol, ond ar yr asgell mae o wedi bod yn chwarae i’w glwb yn ddiweddar. Gan fod Tosh yn ffafrio chwarae gyda thri amddiffynnwr canol, mae’n debygol mai rhywle yn y canol fel cefnwr ymosodol fydd y dewis.

Mae gan Toshack resymau eraill i deimlo’n optimistaidd hefyd, wrth i Abertawe a Chaerdydd wthio am lefydd yn gemau ail gyfle’r Bencampwriaeth. Mae llwyddiant Caerdydd yn rhannol gyfrifol i’r to o Gymry ifanc  yn eu rhengoedd gyda Darcy Blake ac Adam Mathews yn creu argraff yn ddiweddar, tra bod Joe Ledley hefyd wedi dychwelyd o anaf i gipio’r fuddugoliaeth yn erbyn QPR ddydd Sadwrn. Boed Caerdydd yno neu beidio, mae ‘na obaith reit dda o weld un neu ddau o’r rhain yn yr Uwch Gynghrair tymor nesaf. Yn yr un modd mae ‘na Gymry allweddol yn nhîm Abertawe, Ashley Williams,  Joe Allen a David Cotterill  – ill tri’n debygol o fod yn aelodau pwysig o garfan Toshack yn yr Hydref. Rhaid peidio anghofio chwaith am Nottingham Forest sydd â’r Cymry Rob Earnshaw a Chris Gunter yn eu tîm. Oll gyda’i gilydd, mae siawns da iawn y gwelwn ni gwota uwch o Gymry’n chwarae yng Nghynghrair uchaf Lloegr y tymor nesaf a rhaid bod hynny’n newydd da i’r tîm cenedlaethol.

Llun: Sean Dempsey/PA Wire