Owain Schiavone sy’n amlinellu rhai o’r brwydrau fydd yn allweddol yn Wembley heno…

Mae’r cyffro ar fin cyrraedd uchafbwynt, a gêm fwyaf unrhyw dîm pêl-droed Cymreig ger ein bron. Heno, bydd dynion Gary Speed yn herio Lloegr yn Wembley a hynny gyda hyder o’r newydd yn dilyn buddugoliaeth hir ddisgwyliedig ond gampus yn erbyn Montenegro nos Wener.

Roedd y gêm gartref yn erbyn y Saeson yn siom i ddweud y lleiaf, a’r Cymry’n methu â chodi i’r achlysur – ar y cae, nac yn y dorf. Y gofid yw mai tebyg fydd y canlyniad heno, ac mae’r pen yn dweud mai buddugoliaeth gyfforddus i’r Saeson sydd yn ein disgwyl, yn enwedig ar ôl iddyn nhw roi cweir i Fwlgaria nos Wener.

Er hynny, mae’r galon yn mynnu anghytuno, ac efallai bod sawl rheswm da am hynny. Dyma rai awgrymiadau o ble bydd y gêm yn debygol o gael ei hennill a’i cholli.

Wayne v Wayne

Ddim mor syml â brwydr benben efallai, ond yn sicr bydd rhaid i Wayne Cymru, y golwr fod ar ei orau i atal Rooney a’i gyfeillion rhag sgorio heno. Mae Hennessey wedi bod yn chwarae’n dda i’w glwb, Wolves, sydd ar rediad da ac roedd yn soled nos Wener  – doedd dim llawer y galla’i wneud am y gôl.

Mae Wayne Rooney ar dân ar hyn o bryd i’w glwb, ac fe sgoriodd ddwy ym muddugoliaeth y Saeson ym Mwlgaria. Fe fydd yn beryg bywyd heno ond mae cyfrifoldeb gan ei amddiffyn i’w warchod hefyd.

Pa James Collins fydd yn chwarae yn Wembley?

Doedd Collins ddim yn y tîm nos Wener oherwydd gwaharddiad, ond mae ar gael ar gyfer y gêm heno. Er bod Darcy Blake o Gaerdydd wedi gwneud gwaith da yng nghanol yr amddiffyn, mae’n debygol y bydd Speed yn penderfynu mai profiad amddiffynnwr pengoch Aston Villa yw’r opsiwn doeth heno.

Y cwestiwn nesaf yw pa James Collins fyddwn ni’n ei weld ar y cae. Ar y naill law, mae’r amddiffynnwr cydnerth sydd wedi bod yn ddewis cyntaf yn nhîm Aston Villa, ac sydd â’r potensial i fod yn un o amddiffynwyr canol gorau’r Uwch Gynghrair. Ar y llall mae’r Collins a gafodd gemau echrydus wrth i Gymru golli’n ddiweddar i Weriniaeth Iwerddon a Lloegr. Fe fydd yn allweddol heno yn erbyn Rooney a’i gyn cydchwaraewr yn Villa, Ashley Young.

Canol cae

Bydd y frwydr yng nghanol cae yn gwbl allweddol yn Wembley. Rheolodd Lloegr yr ardal yn Stadiwm y Mileniwm ond roedd Cymru’n llawer gwell gyda’r tri yn y canol yn erbyn Montenegro. Wedi dweud hynny, gall Joe Ledley chwarae’n well nac y gwnaeth nos Wener ac mae’n bryd iddo gael perfformiad da i Gymru.

Mae David Vaughan yn golled fawr i Gymru, efallai mwy na Bellamy hyd yn oed. Mae Vaughan yn chwaraewr prysur, sy’n gallu ennill y bêl, a’i chadw. Andrew Crofts ydy’r un amlwg i gymryd ei le yn y canol, tra bod Jack Collison yn opsiwn arall ar ôl gwella o’i salwch – mae’r ddau yn cynnig rhywbeth gwahanol iawn i Vaughan.

Y peth pwysicaf i Gymru yng nghanol y cae ydy rhoi llwyfan da i Aaron Ramsey ddangos ei ddoniau creadigol. Doedd Ramsey ddim yn ffit yn y gêm ddiwethaf yn erbyn Lloegr, ac efallai fod Speed wedi rhoi gormod o bwysau arno wrth ei wneud yn gapten. Erbyn hyn mae Ramsey’n chwarae’n rheolaidd i Arsenal (er mai siomedig fu eu dechrau hwy i’r tymor), ac mae’n tyfu yn ei rôl fel capten. Bydd Lloegr yn dechrau gyda thriawd o Barry, Lampard a Young yn y canol ac mae’n rhaid i Gymru gystadlu.

Bale v Smalling

Roedd Gareth Bale yn wych nos Wener. Ei gêm orau i Gymru hyd yn hyn mae’n siŵr, gan ddangos pa mor allweddol ydy asgellwr Spurs i obeithion Cymru. Os ydy Bale yn chwarae’n dda, mae Spurs yn chwarae’n dda ac mae’r un peth yn wir pan fo yn y crys coch.

Mae Smalling yn ifanc, ond yn amhrofiadol iawn fel cefnwr de. Mae wedi chwarae llond dwrn o gemau i Man Utd yn y safle eleni, ac fe enillodd ei gap cyntaf i Loegr yn erbyn Bwlgaria. Wedi dweud hynny, mae wedi herio Bale unwaith yn barod eleni wrth i Utd roi cweir i Spurs, a thawel iawn oedd y Cymro bryd hynny.

Bydd hyder y ddau yn uchel yn dilyn perfformiadau da nos Wener, ond os all Cymru gael digon o’r bêl i Bale fe all achosi difrod mawr i Loegr.

Oes gan Gymru obaith felly? Wrth gwrs bod gobaith – gêm bêl-droed ydy hi a gall unrhyw beth ddigwydd. Wedi dweud hynny, bydd yn her enfawr i dîm Gary Speed sicrhau unrhyw fath o ganlyniad heno a bydd cefnogwyr Cymru’n fodlon gydag unrhyw berfformiad sy’n well na hwnnw a gafwyd yng Nghaerdydd ym mis Mawrth.

Ar ôl cael amser i ystyried y sefyllfa’n llawn, Tommie Collins sy’n ystyried gobeithio’n Cymru yng Ngrŵp rhagbrofol Cwpan y Byd 2014.

Fe allai wedi bod yn waeth. Fe wnaethom ni osgoi’r cewri yn do. Oes posib i Gymru ennill lle yn ffeinals Cwpan y Byd ym Mrasil 2014? Pam lai? 

Yng Ngrŵp A y glaniodd Cymru, ac yn ymuno â ni oedd, Macedonia, Gwlad Belg, Yr Alban, Croatia a Serbia.  Ydy – mae’r timau o’r Balkans yn dechnegol ar y cyfan, ond, does bosib y gwneith yr achlysur o fod yn gymdogion a gelynion weithio o’n plaid ni?

Mae Gwlad Belg yn dîm ifanc, llawn potensial, fel Cymru.  Ond, does gennym ni ddim byd i’w ofni. 

Rydan ni’n eithaf cyfarwydd â Serbia’n – colli dwy gêm wnaethon ni yng ngemau rhagbrofol Euro 2004, pan oedden nhw’n Serbia a Montenegro. Tydyn nhw ddim mor dda â hynny ar hyn o bryd cofiwch.

Croatia fydd y ffefrynnau, ac maen nhw’n dîm llawn sêr, ond eto, maen nhw wedi gweld eu dyddiau gwell o bosib?

Yr hen elyn – Yr Alban sy’n cyflwyno’r gwrthwynebiad lleol y tro yma. Fe wnaethon nhw roi cweir i Gymru’n ddiweddar yn Nulyn wrth gwrs a heb os, bydd yr hen gefnogwyr yn cofio Anfield 1977 a llaw Joe Jordan. 

Tydi Cymru erioed wedi herio Macedonia, ond mae ganddyn nhw seren enwog sy’n chwarae yn Serie A yr Eidal, Goran Pandev, a dwi’n sicr bod angen i ni roi parch iddyn nhw. Mae eu rheolwr newydd nhw’n siŵr o ychwanegu rhywfaint o sbeis i’r achlysur hefyd.

Dwi’n sicr y bydd Gary Speed a’i dîm hyfforddi’n gweithio’n galed i drefnu’r gemau mewn modd fydd yn fanteisiol i Gymru. Dwi’n sicr hefyd y byddwn ni’n gweld double header oddi cartref wrth i ni wynebu tair gwlad o’r Balkans.

Gobeithio na fydd y Gymdeithas bêl-droed yn cael eu temtio i symud y gemau i stadiwm y mileniwm, oherwydd bydd dim mantais yn hynny i Gymry.

Beth sy’n hollbwysig dros y misoedd nesa bod y chwaraewyr i gyd yn ymuno â’r garfan ar gyfer pob gêm, gan roi’r cyfle gorau i Gary Speed baratoi ar gyfer ei ymgyrch lawn gyntaf wrth y llyw.

Y cefnogwr pêl-droed bytholwyrdd, Tommie Collins sy’n bwrw’i fol am sefyllfa ddigalon ddiweddaraf pêl-droed Cymru.

Yn Rio de Janeiro nos Sadwrn – mae’r enwau’n cael eu tynnu o’r het ar gyfer gemau rhagbrofol Cwpan y Byd 2014 … ac mae Cymru ar waelod y domen.

Na, tydan ni ddim hyd yn oed ym mhot 5 – mae’n tîm rhyngwladol ni’n swyddogol  yn waeth nag Ynysoedd y Faroe, sef un o’r timau gwaethaf yn Ewrop deng mlynedd yn ôl

Beth aeth o’i le i Gymru?  Mae pawb yn cofio tîm Sparky Hughes yn cael y rhediad gwych yna yng ngemau rhagbrofol ymgyrch 2004. Dechreuodd y rhediad gyda’r gêm fythgofiadwy honno’n Helsinki ym mis Medi 2002, ond eto, gorffen yn siomedig oedd ein hanes trwy golli yn erbyn Rwsia ar Stadiwm y Mileniwm yn 2003. 

Yn 1993 roedd Cymru mor uchel â safle 27 yn y byd – nawr rydan ni’n 112.

Be sy’n fy synnu fi ydy bod Norwy ym mhot 1! Ewch yn ôl ddim ond tair blynedd ac roeddem ni’n eu curo nhw o 3-0 ar y Cae Ras yn Wrecsam.

Felly nos Sadwrn – fe fydd cefnogwyr brwd Cymru yn aros i weld pwy gawn ni, wrth gwrs nawn byth ennill lle yn y ffeinals, ond o leiaf bydd ddim rhaid i ni fynd i San Marino eto.

Nid oedd y gystadleuaeth yn llwyddiant ysgugol i dîm Gary Speed
Wedi i’r llwch setlo ar y gystadleuaeth, mae’r cefnogwr pêl-droed brwd, Tommie Collins, yn asesu llwyddiant Cwpan Cenhedloedd Carling yn ddiweddar. 

Dwi gofio pryd cafodd y gystadleuaeth yma ei chyhoeddi, roedd pawb yn bositif iawn ynglŷn â’r potensial. Y bwriad oedd ail-greu’r gemau rhyngwladol cartref ‘slawer dydd.

Ond gyda thorfeydd isel iawn yn bron i bob gêm, methiant llwyr oedd o mewn gwirionedd. 

Fe ddechreuodd ym mis Chwefror ac roedd bob gêm yn  cael eu chwarae yn stadiwm newydd sbon Aviva sef yr hen Landsdowne Road yn Nulyn. Ond y camgymeriad mawr o’r dechrau oedd dewis Iwerddon fel yr ‘host’ cyntaf.  Mae Iwerddon wastad wedi bod yn ddrytach na Phrydain, felly yn enwedig o ystyried y sefyllfa economaidd fregus fyd eang, doedd ddim gobaith i gefnogwyr deithio yn eu miloedd i Ddulyn.

Roedd problem arall wrth geisio rheoli cefnogwyr Gogledd Iwerddon yn y Weriniaeth.  Mae pawb yn gwybod nad oes llawer o gariad rhwng y ddwy wlad. Fe achoswyd trwbl gan y Gogleddwyr ym mis Chwefror wrth herio Yr Alban, ac erbyn mis Mai roedd y Gardai wedi gwneud eu penderfyniad – doedden nhw ddim isho eu gweld nhw yn Iwerddon. 

Fe wnaethon nhw deithio mewn bws wedi ei drefnu’n bwrpasol ar gyfer gêm yn erbyn Gweriniaeth Iwerddon. Ac yn anffodus oherwydd hyn mi benderfynodd cefnogwr y Gogledd droi eu cefn ar anthem genedlaethol y Weriniaeth. Roeddynt yn chwarae Cymru dridiau yn ddiweddarach a dim ond llond bws deithiodd. 

Wrth gwrs roedd y ‘Tartan army’ wedi dod yn eu miloedd, ond roedd llawer wedi troi eu cefn ar y gemau oherwydd y prisiau. 

O Gymru dim ond tua chant a hanner wnaeth fentro drosodd i’r tair gêm.

Roedd hyn yn bechod, yn fy marn i, mae ‘na botensial i’r gystadleuaeth o gael y fformat yn iawn.  Yn amlwg oedd y bwlch rhwng y gemau, yn enwedig rhwng Chwefror a Mai yn broblem, ac yna’r diffyg bwlch i Gymru ar gyfer y ddwy gêm olaf!

Un ateb ydy chwarae dwy gêm y diwrnod, efallai gydag un i ddechrau am 17.30 a’r llall am 20.00. Hefyd yn amlwg mae angen i’r tocynnau  fod yn rhatach – £15 i oedolyn a £5 i blentyn? A fyddai wedi bod yn well gyda Lloegr yn rhan o’r gystadleuaeth? Yn sicr, byddai pob gwlad wrth eu bodd yn eu curo nhw!

Owain Schiavone sy’n gofyn beth mae’r rheolwr newydd, a’r cefnogwyr, wedi ei ddysg yn dilyn gêm Lloegr…

Wedi’r holl heip a gobaith, siom o’r eithaf oedd gêm gartref gyntaf Gary Speed fel rheolwr ar Gymru. Roedd yr hyder wedi dechrau cilio fore Iau gyda’r newyddion na fyddai Gareth Bale – chwaraewr gorau Uwch Gynghrair Lloegr yn ôl rheolwr y Saeson – yn ffit i chwarae. Wedi chwarter awr o’r gêm bnawn Sadwrn roedd pob gobaith wedi diflannu.

Er y siom, mae’r rheolwr newydd wedi dysgu digon o’r golled yn erbyn y Saeson mae’n siŵr. Dyma rai o’r pethau amlycaf.

1.    Tydi gwawdio anthem y gwrthwynebwyr ddim yn helpu. Er gwaetha’r demtasiwn i wawdio God Save the Queen, mae’n rhaid i’r cefnogwyr ddeall nad ydy hynny’n helpu’r tîm ar y cae. I’r gwrthwyneb a dweud y gwir, fe ddywedodd capten Lloegr, John Terry ar ôl y gêm bod clywed y cefnogwyr Cymreig yn bwio eu hanthem genedlaethol wedi sbarduno’r chwaraewyr mewn gwyn. Hawdd credu hynny hefyd wrth wylio eu perfformiad yn yr hanner cyntaf lle prin y cafodd Cymru’r bêl.

2.    Nid cefnwr rhyngwladol mo Danny Collins. Efallai ei fod yn chwarae’n rheolaidd yn yr Uwch Gynghrair i’w glwb Stoke, ond fe brofodd y gêm ddydd Sadwrn nad yw Danny Collins yn ddigon da i chwarae fel cefnwr chwith ar y lefel rhyngwladol. Roedd ail gôl y Saeson yn llawer rhy hawdd, a Collins oedd yn bennaf ar fai am hynny wrth golli ei safle’n llwyr. Yn y gêm fodern mae cefnwyr da yn allweddol i’r tîm ac yn cynnig cymaint, os nad mwy, yn ymosodol ag y maen nhw’n amddiffynnol. Pob tro roedd Collins yn derbyn y bêl gyda gwagle o’i flaen, yn hytrach na chario’r bêl i’r gofod hwnnw i ddechrau ymosodiad roedd yn troi mewn a chwarae’r bêl nôl ar draws cae i Ashley Williams neu James Collins. Ni chafodd Chris Gunter ei gêm orau i Gymru ar yr ochr arall, ond o leiaf roedd yn trio helpu’n ymosodol. Efallai bod gan Collins rywbeth i’w gynnig fel aelod carfan yng nghanol yr amddiffyn, ond mae angen i Speed feddwl am opsiwn arall fel cefnwr chwith i Gymru. Efallai mai Toshack oedd yn iawn am hwn wedi’r cyfan!

3.    Mae Joe Ledley wedi gwneud camgymeriad yn symud i Celtic. Dwi ddim yn meddwl bod y chwaraewr canol cae wedi cael gyrfa ryngwladol dda hyd yn hyn beth bynnag, ond roedd yn siomedig iawn yn erbyn y Saeson. Roedd ei egni a gwaith caled yn effeithiol i Gaerdydd ar lefel y Bencampwriaeth, ac mae’r adroddiadau’n awgrymu fod hynny’n wir eleni yn Uwch Gynghrair yr Alban. Wrth i’w gytundeb gyda Chaerdydd ddirwyn i ben llynedd, roedd yn gyfle i Ledley symud i dîm ar lefel uwch ac er bod diddordeb gan dimau Uwch Gynghrair Lloegr, Celtic oedd ei ddewis gyda chyfle i chwarae yn Ewrop. Doedd dim siâp arno ddydd Sadwrn sy’n awgrymu bod diffyg natur gystadleuol prif Gynghrair yr Alban wedi effeithio ar ei gêm – wedi’r cyfan, mae’n gwestiwn a fyddai hyd yn oed Celtic a Rangers yn gystadleuol yn Uwch Gynghrair Lloegr heb sôn am y gweddill! O siarad â nifer o gefnogwyr eraill ar ôl y gêm, y teimlad oedd y byddai wedi bod yn well i Gymru petai Ledley wedi aros gyda Chaerdydd.

4.    Dylai David Vaughan fod yn dechrau yng nghanol cae. Mae’r Cymro Cymraeg o Abergele wedi bod yn chwarae’n rheolaidd i’w glwb, Blackpool yn yr Uwch Gynghrair eleni. Efallai mai Charlie Adam sy’n cipio’r penawdau i dîm Ian Holloway, ond mae gan y cefnogwyr feddwl mawr o Vaughan, ac yn credu mai fo sy’n bennaf gyfrifol am wneud i’r tîm dicio. Er hynny, fe benderfynodd Speed i ddewis Ledley a dau chwaraewr o’r Bencampwriaeth o flaen Vaughan ddydd Sadwrn. Mae Andy King ac Andrew Crofts yn cael tymhorau da iawn gyda Chaerlŷr a Norwich yn y Bencampwriaeth, ond roedd Cymru angen rhywun o natur hunanfeddiannol Vaughan yn erbyn y Saeson. Daeth Vaughan i’r cae gyda 25 munud o’r gêm yn weddill ac fe ddangosodd yn y 25 munud hwnnw’n union pam y dylai fod ar y cae am y 90 cyfan. Roedd yn chwilio am y bêl trwy’r amser, wastad yn cefnogi ei gyd chwaraewyr, a ni ildiodd y meddiant unwaith er iddo’i phasio bron gymaint ag y gwnaeth King, Crofts a Ledley trwy’r gêm. Ar ben hynny fe ddangosodd ei fod yn gallu bod yn gystadleuol, yn enwedig gydag un dacl wych yn fuan ar ôl dod i’r cae. Fe allai Vaughan fod yn chwaraewr allweddol i Gymru, fel y mae i Blackpool gan wneud y gwaith caib a rhaw er mwyn rhyddhau creadigrwydd Ramsey, Bale a Bellamy.

5.    Mae angen gwella safon maes Stadiwm y Mileniwm. A ddylai gemau’r tîm pêl-droed gael eu chwarae ar Stadiwm y Mileniwn beth bynnag? Mae hon yn ddadl sy’n hollti barn fel rheol. Ar gyfer y gêm dydd Sadwrn, diwedd y gân yw’r geiniog ac er y diffyg awyrgylch ar brydiau dwi’n meddwl bod y penderfyniad yn un cywir gan y Gymdeithas Bêl-droed ar gyfer y gêm arbennig yma. Oni bai bod Speed yn creu chwyldro dros nos a’n bod ni’n dechrau gweld yr un math o dorfeydd ag oedd yng nghyfnod Mark Hughes wrth y llyw, mae’n annhebygol y bydd llawer o gemau Cymru’n cael eu chwarae yn y Stadiwm yn y dyfodol agos. Os bydd, yna mae angen ceisio sicrhau bod safon y cae yn well. Byddai rhai yn dadlau bod safon y maes o fantais i Gymru, neu’n hytrach yn fwy o anfantais i Loegr, ond ddydd Sadwrn fe lwyddodd y Saeson i ymdopi’n well â’r amgylchiadau. Er bod Cymru’n honni mai’r cae oedd yn gyfrifol am lithriad James Collins wrth arwain at y gic o’r smotyn, ddylai Speed ddim defnyddio hynny fel esgus. Wedi dweud hynny, roedd nifer o chwaraewyr yn ei chael hi’n anodd, yn arbennig Aaron Ramsey efallai oedd yn cario’r fath ddisgwyliadau uchel.

Andy King
Y chwaraewr canol cae, Andy King, a’r blaenwr, Hal Robson-Kanu, oedd dau o’r chwaraewyr prin a gafodd farc parchus am eu perfformiadau yn Iwerddon neithiwr.

Dyma farciau Golwg 360:

Wayne Hennessey – Nôl yn ddewis cyntaf i Wolves ac fe gafodd hanner cyntaf ddigon cyfforddus. Dau arbediad da ar ddechrau’r ail hanner ond wedyn aeth pethau o chwith. Doedd fawr ddim y gallai ei wneud am y ddwy gôl gyntaf ond ei safle’n wael ar gyfer y drydedd. (5/10)

Neal Eardley – Un sy’n cael ei le yn nhîm cyntaf Blackpool a chyfle mawr wrth gael ei ddewis i ddechrau yn lle Chris Gunter. Fe gollodd y bêl bob tro y cafodd hi a chael ei eilyddio ar yr hanner. (4)

Sam Ricketts – Gêm dawel heb gynnig cymaint ag arfer i’r ymosod. Mae angen mwy gan chwaraewr hŷn fel fo. (5)

Danny Collins – Cael ei ddewis i ddechrau yng nghanol yr amddiffyn a heb wneud llawer o’i le. (6)

James Collins – Fe wnaeth ymdopi’n ddigon cyfforddus â bygythiad corfforol Jon Walters yn yr hanner cyntaf ond ail hanner siomedig iawn gan y capten. Dylai fod wedi cau Gibson ynghynt cyn y gôl gyntaf ac roedd ei rwystredigaeth yn amlwg wrth droseddu ar ymyl y cwrt gan roi cyfle i’r Gwyddelod sgorio’r drydedd. (5)

Andrew Crofts – Mae’n cael tymor da gyda Norwich ac mae’n rhoi awch i ganol y cae. Gêm effeithlon ond heb fod yn effeithiol. (5)

David Vaughan – Y chwaraewr creadigol yng nghanol cae cyntaf Speed. Roedd yn brysur ac yn daclus iawn yn yr hanner cyntaf ond angen rhywun fel Ramsey wrth ei ochr. Ychydig ar fai am y gôl gyntaf gan roi gormod o le i Gibson. (5)

Andy King – Un arall sy’n cael tymor arbennig o dda gyda’i glwb, Caerlŷr ac yn haeddu dechrau. Mae’n cynnig bygythiad ymosodol o ganol cae, ond fel gyda gweddill y tîm, ail hanner tawel. (7)

Simon Church – Ergyd dda o bellter cyn yr hanner i brofi Shay Given, ac yna un arall hanner ffordd trwy’r ail hanner. Dim digon o bêl i greu argraff mewn safle anghyfarwydd ar yr asgell. (6)

Robbert Earnshaw – Edrych yn fwy bywiog nag ers sbel yn yr hanner cyntaf ond wedi’i ynysu’n rhy aml ar ben ei hun yn y llinell flaen a diflannodd o’r gêm wedi’r egwyl. (5)

Hal Robson-Kanu – Colli’r bêl yn syth gyda’i ddau gyffyrddiad cyntaf, ond setlo’n fuan wedyn ac yn cynnig bygythiad gwirioneddol. Bron ag ennill cic gosb yn yr hanner cyntaf ac yn anlwcus i gael ei eilyddio’n weddol gynnar yn y gêm. (7)

Eilyddion:

Chris Gunter (am Eardley ’45) – Edrych yn fwy cyfforddus na Eardley ond yn gyfan gwbl ar fai am ail gôl Iwerddon. (4)

Joe Ledley (am Vaughan ’61) – Bywiog a gweithgar ond dim creadigrwydd. (6)

Freddy Eastwood (am Robson-Kanu ’68) – Ymddangosiad cyntaf i Gymru ers amser ond roedd Cymru wedi colli siâp erbyn iddo gyrraedd y maes a dim cyfle i greu argraff. (5)

Jermaine Easter (am Earnshaw ’80) – Prin yn cyffwrdd y bêl felly anodd barnu. (5)

Lewin Nyatanga – (am Ricketts ‘ 82) – Eilydd hwyr a dim llawer o gyfle. (5)