Luned Mair, Llanwenog, yn ennill y Gadair am yr ail dro'n olynol - rhagor o luniau islaw
Am yr ail flwyddyn yn olynol, Clwb Llanwenog oedd enillwyr Eisteddfod Ffermwyr Ifanc Ceredigion.
Ac, am yr ail flwyddyn yn olynol, un o aelodau’r clwb oedd enillwyr y Gadair.
Ar ddiwedd y cystadlu tros noson a diwrnod ym Mhafiliwn Pontrhydfendigaid, roedd Llanwenog ymhell ar y blaen i’r ail glwb, Pontsian, gydag wyth o wobrau cyntaf yn yr adran waith cartref yn gwneud gwahaniaeth mawr.
Pontsian oedd enillwyr y côr ond fe fydd amrywiaeth mawr o glybiau – gan gynnwys rhai o’r clybiau llai – yn cael eu cynrychioli yn eisteddfod genedlaethol y mudiad y penwythnos nesa’.
Luned Mair o Glwb Llanwenog oedd Llenor y Gadair, gan ennill canmoliaeth uchel am stori fer ar y testun ‘Drych’.
Yn ôl y beirniad, Karina Dafis, roedd hi’n “defnyddio iaith yn gryno fachog” ac fe ddywedodd ei bod wedi cael ei “gwefreiddio gan aeddfedrwydd y cyfanwaith”.
Dwy stori arall a ddaeth yn ail a thrydydd hefyd, gyda’r ail, Elin Dafydd o Droedyraur yn agos iawn. O Droedyraur yr oedd y drydedd hefyd, Lowri Evans.
Trefn y clybiau
Llanwenog 95
Pontsian 75
Caerwedros 68
Troedyraur 43
Mydroilyn 38
Lluniau’r Eisteddfod
Ail yn y sgets - Mydroilyn
Trydydd yn y sgets - Caerwedros