Warren Gatland
Mae disgwyl i Warren Gatland enwi’r tîm fydd yn wynebu’r Alban ddydd Sul y prynhawn yma.

Yn ol adroddiadau ar safle Wales Online fe fydd Sam Warburton yn chwarae Ddydd Sul, ond ni fydd Justin Tipuric  ar gael oherwydd anaf i’w ffêr.

Roedd Tipuric, blaen asgellwr y Gweilch, wedi troi ei ffêr yn Nulyn.

Mae’r capten Sam Warburton wedi bod yn cael triniaeth i’w goes, yn dilyn anaf yn erbyn Iwerddon yng ngêm gyntaf Cymru ym Mhencampwriaeth y Chwe Gwlad.

Ryan Jones i gymryd lle Bradley Davies?

Disgwylir i Ryan Jones gymryd lle Bradley Davies yn yr ail reng, yn dilyn gwaharddiad Davies ddoe am ei dacl anghyfreithlon ar Donnacha Ryan yn y gêm yn erbyn Iwerddon.

Bydd Gatland hefyd angen penderfynu pwy fydd yn chwarae fel prop pen rhydd.

Mae ganddo’r dewis o Rhys Gill, a oedd yn addawol iawn yn erbyn y Gwyddelod, neu ei Lew Prydeinig Gethin Jenkins, sydd wedi gwella o’i anaf.