Dim ond triphwynt sy’n gwahanu West Ham, Southampton a Chaerdydd ar frig y Bencampwriaeth.

Wedi cipio pwynt nos Fawrth ddiwethaf yn erbyn Southampton, bydd Caerdydd yn croesawu Blackpool i Stadiwm Caerdydd yfory.

Mae Blackpool yn y seithfed safle ac heb golli gêm hyd yma eleni.

Effallai bydd Capten yr Adar Gleision yn dychwelyd i’r tîm yfory, wedi colli’r ddwy gêm ddiwethaf sef y fuddugoliaeth dros Crystal Palace a’r gêm gyfartal yn erbyn Southampton oherwydd anaf i’w goes.

Fodd bynnag, bydd rhaid i Mark Hudson ddisodli Ben Turner neu Anthony Gerrard o’i safleoedd – mae’r ddau wedi bod yn rhagorol yn ei absenoldeb.

Mae Kevin McNaughton yn debygol o gadw ei le yn yr amddiffyn ar ôl dechrau o flaen Darcy Blake yn erbyn y Seintiau yng nghanol yr wythnos, tra bod y ddau ymosodwyr Joe Mason a Rudy Gestede yn obeithiol o gadw eu lle hefyd.

Gyda buddugoliaeth yfory, gallai’r Adar Gleision nythu ar frig y Bencampwriaeth, pe bai canlyniadau yn mynd o’u plaid mewn gemau eraill.