Ryan Giggs
Heddiw fe gadarnhaodd Manchester United bod Ryan Giggs wedi arwyddo cytundeb i chwarae iddyn nhw am dymor arall.

Mae’r Cymro 38 oed yn chwarae iddyn nhw ers mis Mawrth 1991.

Yn ystod gyrfa hirfaith mae Giggs wedi chwarae 898 o weithiau i’r clwb, gan sgorio 162 o goliau ac ennill 12 o deitlau Uwch Gynghriar Lloegr, pedair Cwpan FA, tair Cwpan Cynghrair a dau dlws Cyngrhair Pencampwyr Ewrop.

‘‘Mewn nifer o ffyrdd mae Ryan wedi cynrychioli fy holl dimau yma,” meddai Alex Ferguson, rheolwr Man U.

“Mae wedi ail-ddyfeisio ei hun ac wedi addasu i natur y gêm yn ogystal â chadw bob awydd i lwyddo.

‘‘Gall y chwaraewyr ifanc ddysgu llawer wrtho, a fydd yn chwaraewr fydd yn parhau i dorri records yn y gêm yma,’’ ychwanegodd.

Ac mae Giggs, sy’ wedi dod yn enwog yn ddiweddar am gael affêr efo’r seren seleb Imogen Thomas yn ogystal â gwraig ei frawd bach, ar ben ei ddigon.

‘‘Pan arwyddais fy nghytundeb cyntaf, nid oeddwn yn meddwl am eiliad y byddwn yn parhau i chwarae i United am 22 o flynyddoedd.  Ond rwy’n teimlo’n dda ac yn gwybod y gallaf barhau i gyfrannu tuag at y clwb wrth geisio am anrhydeddau bellach,’’ meddai Giggs.