Raymond Verheijen
Mae Ray Verheijen, oedd yn gobeithio olynu Gary Speed fel rheolwr Cymru, wedi bod yn corddi’r dyfroedd ar Twitter.
Mae Verheijen wedi beirniadu Cymdeithas Bêl-droed Cymru am beidio gadael iddo wybod mai ef fyddai’n rheoli’r tîm yn ystod gêm goffa Gary Speed wythnos nesaf.
Dywedodd: “Ges i syrpreis mawr i glywed gan newyddiadurwyr mai fi fydd yn rheoli’r tîm yn ystod gêm Cymru yn erbyn Costa Rica wythnos nesaf. Does neb o’r FAW wedi gadael i fi wybod am hyn,” meddai Verheijen ar Twitter neithiwr.
Yn dilyn hynny, trydarodd eto: “Newydd glywed fod Rheolwr Gweithredol y Tîm Adrian Davies wedi ei ddiswyddo a fydd e ddim gyda’r tîm yng Ngêm Goffa ei ffrind Gary Speed.”
Chris Coleman a Dutch Ray
Roedd Chris Coleman, rheolwr newydd tîm Cymru, wedi dweud wrth y BBC ar ddechrau’r mis ei fod yn chwilio am ffyrdd o gadw Raymond ‘Dutch Ray’ Verheijen yn rhan o’i dîm hyfforddi.
Bu cyfarfod rhwng y ddau ar ddechrau’r mis, yn dilyn tensiwn rhwng y ddau ar ôl i Verheijen ddweud ei fod ef yn awyddus i olynu Gary Speed.
Bu Verheijen mewn trafferth yn dilyn ei sylwadau ar Twitter ym mis Rhagfyr y llynedd wedi iddo drydar fod Gary Speed wedi dweud wrtho ei fod am iddo fe barhau gyda gwaith y cyn reolwr, ac arwain tîm Cymru.
Bu farw Gary Speed, 42 oed, ym mis Tachwedd y llynedd.
Fe fydd Cymru yn chwarae Costa Rica mewn gêm gyfeillgar yn Stadiwm Dinas Caerdydd, nos Fercher, Chwefror 29.
Costa Rica oedd y tîm cyntaf i Gary Speed chwarae yn eu herbyn dros Gymru, yn Mai 1990. Enillodd Cymru 1-0.
Bydd y gêm yn cychwyn am 7.45pm.
Mae tocynnau ar gael ar www.cardiffcityfc.co.uk.