Cynyddu maint testun

Golwg360

Chwaraeon



AC yn galw am gynghrair haf yng Nghymru

Ionawr 22, 2013 17:01


Mae Aelod Cynulliad o Abertawe wedi galw am newid yn strwythur Uwch Gynghrair pêl-droed Cymru, er mwyn creu mwy o ddiddordeb yn y gystadleuaeth.

Dywedodd yr AC Llafur Mike Hedges wrth Golwg360 bod angen cynnal y gynghrair dros fisoedd yr haf, fel nad oes cymaint o gystadleuaeth am gefnogwyr a sylw’r cyfryngau gyda thimoedd mwyaf Cymru, Abertawe a Chaerdydd.

Awgrymodd Hedges y gall symud y bencampwriaeth i’r haf – fel y mae rygbi’r gynghrair wedi ei wneud yn Lloegr a phêl-droed yng Ngweriniaeth Iwerddon – greu mwy o ddiddordeb yn Uwch Gynghrair Cymru.  Byddai hyn yn ei dro yn denu mwy o gefnogwyr, a mwy o arian i’r clybiau.

“Ar hyn o bryd, mae gan y gynghrair duedd tuag at y gogledd a’r canolbarth, gan fod llai o ddiddordeb yn y de.  Ond buasai cynnal y bencampwriaeth yn yr haf yn golygu llai o gystadleuaeth hefo timau fel Caerdydd ac Abertawe.  Byddai hefyd mwy o siawns cael darllediad dros y DU, ar sianel fel Sky, gan fod llai o chwaraeon ymlaen yn yr haf beth bynnag,” meddai.

‘Gwella’r safon’

Cyfaddodd Hedges y gall fod safon isel y chwarae yn rhan o’r broblem o ddenu gwylwyr, ond honnodd y byddai ail-strwythuro’r gystadleuaeth yn gwella hynny.

“Gall bencampwriaeth yn yr haf ddenu chwaraewyr ar fenthyciad o gynghreiriau eraill, a byddai hynny’n gwella’r safon. Gall hefyd wella perfformiad timau Cymru yn Ewrop.”

Mae rowndiau cynnar y cystadlaethau Ewropeaidd yn cael eu cynnal dros yr haf, pan mae timau fel arfer ar seibiant o chwarae. Mae Hedges yn honni bod timau’n gwneud yn well yn Ewrop pan maen nhw wedi bod yn chwarae’n gyson.

“Y gwir yw bod timau Cymru yn cael eu curo gan dimau o wledydd na all y rhan fwyaf o bobol Cymru eu hadnabod ar fap. Os gall timau Cymru wneud yn well yng nghystadlaethau Ewropeaidd, byddai’n dod ag arian i mewn i’r clybiau, ac yn denu pobol i wylio a chefnogi,” meddai.

Dywedodd Mike Hedges bod Afan Lido, tîm o ardal Port Talbot, yn methu a denu cefnogwyr gan fod clwb Abertawe yn hawlio sylw yn yr ardal.  Ond byddai chwarae dros yr haf yn golygu mwy o gefnogwyr yn ei farn ef.

“Y peth pwysicaf yw denu pobol i wylio. Ar hyn o bryd, mae timau Cymru yn denu torfeydd yn y cannoedd isel, mae’n rhaid cael mwy o ddiddordeb yn y gystadleuaeth.”

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.