Mae’r BBC yn dweud y bydd cyn-seren Cymru, Shane Williams, yn rhoi’r gorau i rygbi’n llwyr ar ddiwedd y tymor hwn.

Er fod ganddo flwyddyn arall  o gytundeb gyda’r Gweilch yn Abertawe, y disgwyl yw y bydd yn mynd cyn hynny ac  mae wedi mynegi diddordeb o’r blaen mewn troi at hyfforddi.

Fe fydd yr asgellwr o Ddyffryn Aman yn rhan o dîm sylwebu’r BBC yn ystod Pencampwriaeth y Chwe Gwlad eleni ar ôl iddo ymddeol o rygbi rhyngwladol yn yr hydref y llynedd.

Os yw’r newyddion yn wir, fe fydd yn ddiwedd ar un o yrfaoedd mwya’ disglair y cyfnod diweddar, gan gynnwys torri record ceisiau Cymru a chael ei ddewis yn chwaraewr rhyngwladol y flwyddyn yn 2008.

Cryfder mawr y chwaraewr 5’7” oedd ochrgamu a gwibio mewn sefyllfaoedd tynn ac roedd ar ei orau pan oedd y chwarae’n agored a rhydd, arddull Cymru ym mlynyddoedd y Gamp Lawn yn y 2000oedd.