Cynyddu maint testun

RSS

Golwg360

Chwaraeon



Gweilch yn Curo’r Gleision

Tachwedd 30, 2012 21:18, Diweddarwyd am 21:48

Gweilch 33–12 Gleision

Cafodd y Gweilch fuddugoliaeth gyfforddus yn erbyn y Gleision yn y RaboDirect Pro12 ar y Liberty nos Wener.

Llwyr reolodd y tîm cartref yr hanner cyntaf a sicrhaodd cais James King fantais iddynt ar yr hanner. Roedd yr ymwelwyr o’r brifddinas fymryn yn well wedi’r egwyl ond ychwanegodd Richard Fussell a Morgan Allen ddau gais arall wrth i’r Gweilch ennill yn hawdd yn y diwedd.

Hanner Cyntaf

Dim ond un tîm oedd ynddi yn yr hanner cyntaf a gyda sgrym yr ymwelwyr yn gwegian fe giciodd Matthew Morgan y Gweilch dri phwynt ar y blaen wedi deg munud.

Aeth y tîm cartref ym mhellach ar y blaen ddau funud yn ddiweddarach pan groesodd y clo, King, yn dilyn meddiant glân o’r lein, 10-0 yn dilyn trosiad taclus Morgan o’r ystlys.

Methodd y maswr bach un cyfle i ymestyn y fantais honno hanner ffordd trwy’r hanner ond llwyddodd gyda chynnig arall yn fuan wedyn i roi ei dîm dri phwynt ar ddeg ar y blaen.

Sgoriodd Sweeney bwyntiau cyntaf y Gleision chwarter awr cyn yr egwyl cyn i’r ddau faswr gyfnewid cic gosb yr un eto cyn hanner amser, 16-6 i’r Gweilch wedi deugain munud.

Ail Hanner

Daeth ail gais y Gweilch yn fuan iawn yn yr ail hanner a hwn oedd cais mwyaf atyniadol y gêm, cic Ross Jones a chwrs Fussell yn arwain at gais da i’r cefnwr.

Er gwaethaf y cais hwnnw, roedd y Gleision yn llawer mwy cystadleuol yn yr ail gyfnod ac adlewyrchwyd hynny pan drosodd Rhys Patchell dri phwynt i gau’r bwlch gyda dros hanner awr ar ôl.

Yna, anfonwyd blaenasgellwr y Gweilch, Sam Lewis, i’r gell gosb. Ond er i Patchell drosi’r gic gosb ganlynol, methodd y Gleision â manteisio ym mhellach.

A’r Gweilch a gafodd y gair olaf wrth iddynt orffen y gêm yn gryf. Croesodd yr eilydd wythwr, Morgan Allen, yn rhy rhwydd o lawer o gefn y lein ac ychwanegodd Morgan y trosiad wrth iddi orffen yn 33-12 o blaid y tîm cartref.

Mae’r fuddugoliaeth yn codi’r Gweilch i’r pedwerydd safle yn nhabl y Pro12 tra mae’r Gleision yn aros yn seithfed.

Seren y Gêm

Mewnwr y Gweilch, Kahn Fotuali’i:

“I’r blaenwyr mae’r diolch, nhw sy’n rhoi’r bêl a’r platfform i ni’r olwyr ac rydyn ni’n falch iawn ohonynt.”

“Amddiffyn sy’n ennill gemau felly roeddem yn gwybod fod rhaid inni weithio’n galed.”

.

Gweilch

Ceisiau: James King 12’, Richard Fussell 42’, Morgan Allen 79’

Trosiadau: Matthew Morgan 13’, 43’, 79’

Ciciau Cosb: Matthew Morgan 10’, 24’, 37’

Cerdyn Melyn: Sam Lewis 51’

Gleision

Ciciau Cosb: Ceri Sweeney 26’, 39’, Rhys Patchell 47’, 51’

Cerdyn Melyn: Josh Navidi 76′

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.