Arlywydd Assad Syria
Mae pump o bobol wedi eu harestio ar ôl cael mynediad i lysgenhadaeth Syria yn Llundain yn ystod protest, cyhoeddodd Scotland Yard heddiw.

Roedd tua 150 o bobol wedi protestio yn y llysgenhadaeth yn Sgwâr Belgrave yn dilyn adroddiadau fod mwy na 200 wedi eu lladd gan lywodreath Syria yn ninas Homs.

Dywedodd llefarydd ar ran Heddlu’r Met fod nifer o bobol wedi eu harestio am fynd yn groes i’r drefn gyhoeddus.

Dechreuodd y protest am 2am y bore ma ac roedd yr heddlu wedi ymddwyn mewn modd “priodol”, medden nhw.

Cafodd ffenestri’r adeilad eu malurio yn ystod y brotest.

“Roedd pum dyn wedi cael mynediad i’r adeilad. Maen nhw bellach wedi eu harestio,” meddai lefarydd ar ran yr heddlu.

Cynllun

Daw’r brotest wrth i Gyngor Diogelwch y Cenhedloedd Unedig baratoi i gyfarfod heddiw er mwyn cymeradwyo cynllun i sicrhau heddwch yn Syria.

Maen nhw wedi gwrthod ymyrraeth filwrol yn y wlad ond yn gobeithio y bydd modd gorfodi’r Arlywydd Bashar Assad i drosglwyddo grym i’w ddirprwy-arlywydd.

Mae o leiaf 5,500 o bobol wedi marw yn y wlad ers i brotestwyr sydd o blaid democratiaeth ddechrau protestio yn erbyn yr Arlywydd Bashar Assad y llynedd.

Mae’r protestwyr yn honni fod gweinyddiaeth Assad wedi defnyddio tanciau a gynau peiriant i ladd o leiaf 200 o bobol ac anafu cannoedd yn ninas Homs.

Os yw’r honiadau yn wir dyma fyddai’r ymosodiad mwyaf gwaedlyd o’i fath ers dechrau’r brwydro.