Ysbyty Gwynedd
Mae elusen WRVS wedi dweud wrth Golwg 360 y gallai cyflenwyr lleol eraill bwyd Ysbyty Gwynedd golli eu cytundebau.

Maen nhw’n cynnal adolygiad ar hyn o bryd, wedi’r penderfyniad i roi’r gorau i brynu brechdanau’r caffi gan gwmni Menai Deli.

Maen nhw wedi penderfynu prynu’r brechdanau gan gwmni Ginsters yn lle. Bydd chwe aelod staff o gwmni Menai Deli yn colli eu swyddi yn sgil penderfyniad.

“Ar hyn o bryd, mae’r WRVS yn ail edrych ar sawl un o’n cyflenwyr,” meddai llefarydd wrth Golwg 360.

“Hyd nes y bydd y broses honno wedi’i gwblhau allen ni ddim cynnig sylw am gyflenwyr unigol.

“Bydd unrhyw benderfyniad a wnawn er budd cynyddu cyllid sy’n cael ei ail-fuddsoddi yn ein gwasanaeth i bobl hŷn yn yr ardal.”

Ymhlith y busnesau lleol eraill sy’n cyflenwi ar gyfer yr ysbyty mae Siwgr a Sbeis, R and I Jones yng Nghaernarfon a Blas ar Fwyd yn Llanrwst.

Roedd protest y tu allan i’r ysbyty ddoe yn erbyn y penderfyniad i roi’r gorau i brynu brechdanau Menai Deli.

Dywedodd llefarydd ar ran y protestwyr fod rhai ohonyn nhw’n ystyried rhoi’r gorau i wirfoddoli yn y caffi o ganlyniad i’r penderfyniad.

Mae dros 1,400 o bobol wedi ymuno â’r grŵp Facebook Brechdanau Lleol i Ysbyty Gwynedd.

Bydd Menai Deli yn rhoi’r gorau i gyflenwi brechdanau i’r ysbyty ar 9 Medi.