Trawsfynydd
Mae AC Dwyfor Meirionnydd wedi croesawu’r cyhoeddiad bod hen safle niwclear Trawsfynydd yn cael ei gwneud yn Barth Menter Ynni arbenigol.

Cyhoeddodd y Gweinidog Economi a Busnes, Edwina Hart, y newyddion yn y Senedd ddoe.

Bwriad Llywodraeth Cymru yw datblygu’r Safle Ddatgomisiynu Niwclear yn barth arbenigol Ynni, Amgylchedd a Thechnoleg Newydd yng nghalon Parc Cenedlaethol Eryri.

‘Economi werdd’

“Rwyf wrth fy modd gyda’r cyhoeddiad, ac yn falch dros ben fod y Gweinidog wedi cydnabod yr angen am fuddsoddiad yn safle Trawsfynydd,” dywedodd yr AC Dafydd Elis-Thomas, llefarydd Plaid Cymru ar yr Amgylchedd ac Ynni.

“Rhaid i ni yn awr fanteisio ar gyfleoedd yr economi werdd yma yng Nghymru, gan fuddsoddi mewn swyddi gwyrdd a thrwy hynny helpu adferiad economaidd cynaliadwy.

“Mae creu Parth Menter Ynni yn Nhrawsfynydd, ar safle sydd â chymaint o botensial i ddatblygu a chreu ynni adnewyddol, yn esiampl berffaith o’r modd y gall llywodraeth a busnes gydweithio a chreu twf cynaliadwy.”

‘Gobaith newydd i’r ardal’

“Bydd dynodi Trawsfynydd fel Parth Menter yn creu gobaith newydd i’r ardal,” dywedodd Dyfed Edwards, Arweinydd y Blaid ar Gyngor Gwynedd.

“Mae hyn yn newyddion gwych i Drawsfynydd, i Feirionnydd ac yn wir i’r gogledd-orllewin yn ei gyfanrwydd.”