Y si yw y bydd y cyn chwaraewr rygbi rhyngwladol a chapten Cymru, Gareth Thomas, sy’n awr yn chwarae rygbi’r gynghrair, yn gadael y Crusaders ac yn chwarae i Wigan yn y dyfodol.
Mae tîm chwaraeon y BBC yn dweud y bydd cyhoeddiad yn cael ei wneud mewn cynhadledd i’r wasg dydd Mawrth nesaf. Dywedir hefyd mai Shaun Wane fydd hyfforddwr newydd y Wigan Warriors, ac mai’r Cymro Iestyn Harris fydd yn ei gynorthwyo.
Penderfynodd Harris adael ei swydd yn hyfforddi’r Crusaders yn Wrecsam pan benderfynodd y clwb hwnnw adael yr Uwch Gynghrair (Super League).
Nid yw Gareth wedi chwarae ers mis Gorffennaf ar ôl torri ei fraich, ond mae’n debyg y bydd yn chwarae i Gymru ar 22 Hydref pan fydd y Cymry yn wynebu Iwerddon yng Nghastell-nedd.