Colette Davies
Mae Heddlu’r De wedi arestio dyn ar amheuaeth o lofruddiaeth – saith mlynedd ar ôl i wraig o Gymru syrthio i’w marwolaeth tra ar wyliau yn India gyda’i gŵr.
Roedd Colette Davies o Benybont ar Ogwr yn 39 oed pan fu farw ger pont dros Afon Giri, yn Gaura, yn nhalaith Himachal Pradesh yn mis Chwefror 2004.
Dywedodd swyddogion ei bod hi wedi disgyn o uchder ac wedi cael anafiadau angheuol o ganlyniad.
Bu’r heddlu yn India yn ymchwilio ar y pryd, ond doeddan nhw ddim yn credu bod ei marwolaeth yn amheus.
Cafodd corff Colette Davies ei gludo nôl i Gymru a chafodd ei hangladd ei gynnal yn Amlosgfa Llangrallo ym Mhenybont ar Ogwr ym mis Mawrth 2004.
Yn ddiweddarach fe aeth ditectifs Heddlu De Cymru i India i weithio gyda’r heddlu yn Himachal Pradesh er mwyn ail-ymchwilio i’r achos.
Y bore ma fy gyhoeddoedd yr heddlu, yn dilyn adolygiad gan eu timau arbenigol, eu bod nhw wedi arestio dyn 50 oed, gynt o Benybont ar Ogwr, yn ardal Milton Keynes ar amheuaeth o lofruddiaeth.
Dywedodd y Ditectif Arolygydd Mark Lewis: “Er bod hyn yn ddatblygiad positif yn yr ymchwiliad, rydw i hefyd yn apelio am wybodaeth am amgylchiadau’r marwolaeth.”
Dywedodd bod teulu Colette Davies wedi cael gwybod am y datblygiadau diweddaraf.