Susan Elan Jones
Mae AS De Clwyd wedi ysgrifennu at Digital Uk yn galw am wybod pam bod pobol ei hetholaeth ddim yn medru derbyn rhaglenni o Gymru.
Mae Susan Elan Jones, AS Llafur yn dweud bod y sefyllfa yn “warthus”.
“Mae fy etholwyr i yn pryderu’n fawr nad ydyn nhw’n gallu derbyn BBC1, BBC2, ITV Wales , S4C, Radio Wales na Radio Cymru.
“Dw i’n gwybod am bobl sydd wedi ffonio Digital UK ac wedi cael cyfarwyddyd nawddoglyd i ail-diwnio eu setiau teledu. Maen nhw’n gwneud hyn – ac wrth gwrs, dydyn nhw dal methu cael y sianeli y dylen nhw gael,” meddai.
“Fe ddywedodd un dyn yn gywir – nad ydi Digital UK yn cymryd ein hunaniaeth Gymreig o ddifrif.”
Mae’r AS yn dweud bod angen i’r cwmni “fynd i’r afael â’r sefyllfa” a’i datrys yn fuan.
“Os nad ydyn nhw – fe fydda i yn mynd â’r mater ymhellach.”
Mae Golwg360 yn aros am ymateb Digital UK.