Mi fydd Gavin Henson yn chwarae ei gêm gynta’ dros dîm Gleision Caerdydd heno yn erbyn Dreigiau Gwent.

Dyma’r bennod ddiweddara’ yng ngyrfa’r cymeriad lliwgar sydd wedi rhoi’r gorau i chwarae rygbi yn y gorffennol er mwyn ffilmio rhaglenni realiti ac ymddangos ar Strictly Come Dancing.

Yn fwy enwog fel tad plant Charlotte Church y tu allan i Gymru, roedd Henson yn chwarae’n dda dros Gymru cyn Cwpan y Byd. Ond cafodd ei anafu mewn gêm gyfeillgar yn erbyn Lloegr ac ni deithiodd i Seland Newydd ar gyfer y ffeinals.

Er iddo ddisgleirio dros Gymru yn safle’r canolwr wrth iddyn nhw gipio’r Gamp Lawn yn 2005 a 2008, yn safle’r cefnwr fydd Henson yn cychwyn heno.

Ers ffarwelio gyda’r Gweilch yn 2009 a chyfnod yn seleb ar y teledu, mae Henson wedi treulio cyfnodau gyda’r Saraseniaid yn Lloegr a Toulon yn Ffrainc.

Ond methiant fu’r ddwy ymdrech honno i aldanio’i yrfa, a bellach mae’r dyn 29 oed yn ceisio’i lwc ym mhrifddinas Cymru.

Mae hyfforddwr Cymru Warren Gatland yn edmygu talentau Henson, ac mi fydd yn gobeithio’i weld yn gwneud sioe dda ohoni heno.

Caerdydd v Dreigiau yn fyw ar S4C heno.