Ysbyty Bryn Beryl
Mae cau ward yn Ysbyty Bryn Beryl ar Benrhyn Llyn dros dro yn angenrheidiol er mwyn gwarchod y gwasanaeth i gleifion yn ôl llefarydd ar ran Bwrdd Iechyd Betsi Cadwalader.
Redd Dr Olwen Williams yn annerch dros 500 o bobl ddaeth ynghyd yn neuadd Ysgol Glan y Môr ym Mhwllheli am eu bod yn poeni am benderfyniad y Bwrdd i gau ward Llyn am dri mis a chyfyngu’r gwasanaeth yn uned mân anafiadau’r ysbyty.
“Mae hyn yn benderfyniad anodd iawn,“ meddai Dr Williams “ond rydym eisiau pwysleisio y bydd y ward yn ail-agor unwaith y byddwn wedi datrys materion yn ymwneud â staffio a recriwtio.”
Dywedodd Michael Strain o Gyngor Cymuned Botwnnog beth bynnag nad oedd y protestwyr yn debygol o goelio hyn.
“Rydym wedi clywed hyn o’r blaen pan gaewyd ward Hafan sy’n parhau ar gau ar ôl blwyddyn a hanner,”meddai. “Mae yna agenda gudd ynglyn â’r pendefyniad yma sydd heb fod yn destun ymgynghoriad cyhoeddus,” ychwanegodd.
Dywedodd y Cynghorydd Peter Read sy’n aelod o’r Cyngor Iechyd Cymunedol ei fod wedi cael ar ddeall gan Brif Weithredwr y Bwrdd na fuasai unrhyw beth yn cael ei gau ym Mryn Beryl ond fod yr addewid yma wedi ei dorri o leiaf dwywaith.
Bydd y gwelyau o Bryn Beryl yn cael eu trosglwyddo i Ysbyty Eryri, Caernarfon ac Ysbyty Gwynedd ym Mangor a’r uned man ddamweiniau ar agor dim ond o 9 -5 o ddydd Llun i ddydd Gwener o dan y drefn newydd.