Cafodd dau berson eu lladd ar ol i awyren fechan daro mynydd ger Y Trallwng ym Mhowys prynhawn ma.
Cafodd y gwasanaethau brys eu galw i’r safle yn ardal Tre’r-Llai am 12.41pm heddiw.
Dywedodd llefarydd ar ran y Gwasanaeth Tân ac Achub: “Mae’r gwasanaethau brys wedi bod yn delio gyda digwyddiad yn ymwneud ag awyren fechan sydd wedi dod i lawr ar fynydd Cefn Digoll.
“Cafodd dau griw o ddiffoddwyr o’r Trallwng ac un o Lanfair Caereinion ynghyd â cherbyd pwmp Land Rover o Lanfyllin eu hanfon i’r safle.”
Dywed Heddlu Dyfed Powys eu bod nhw wedi cysylltu gyda teuluoedd y ddau berson.
Yn ol adroddiadau yn lleol, un o’r rhai fu farw oedd Bob Jones, gwr busnes adnabyddus yn yr ardal ac un o sylfaenwyr Maes Awyr y Trallwng.
Fe fydd yr Adran Ymchwilio i Ddamweiniau Awyr bellach yn cynnal ymchwiliad.