Leanne Wood
Leanne Wood sydd wedi cael y mwya’ o enwebiadau gan etholaethau a changhennau yn ras arweinyddiaeth Plaid Cymru.

Mae’r AC o Ganol De Cymru wedi cael ei chynnig gan chwech etholaeth ac wyth cangen – cyfanswm o 14, sy’n fwy nag enwebiadau’r tri arall gyda’i gilydd.

Dyw nifer yr enwebiadau ddim yn hollbwysig – gan nad yw’r rhan fwya’ o etholaethau a changhennau’n cynnig enwau – ond mae ymgyrch Leanne Wood wedi cyhoeddi ffigwr eu hymgeisydd nhw gan honni bod y ffigwr yn dangos cryfder ei chefnogaeth.

Elin Jones, AC Ceredigion, yw’r ail yn y rhestr, gyda dwy etholaeth a thair cangen, tra bod gan AC Dwyfor Meirionnydd, Dafydd Elis-Thomas, ddwy etholaeth a dwy gangen. Dwy etholaeth sydd wedi cefnogi’r ymgeisydd rhanbarthol, Simon Thomas.

Llawer heb enwebu

MaeLeanne Wood wedi cael cefnogaeth gref gan ganghennau yn y Rhondda ond mae’r lleill hefyd wedi cael cefnogaeth o’r De-ddwyrain.

Yn allweddol, dyw rhai o’r etholaethau a changhennau cryfa’ yn y Gorllewin a’r Gogledd-orllewin ddim wedi enwebu.

Fe fydd cyfres o gyfarfodydd hystingau yn dechrau i aelodau Plaid Cymru led led y wlad ar 9 Chwefror.

Dyma’r enwebiadau:

Leanne Wood

Etholaethau: Dwyrain Abertawe, Maldwyn, Gŵyr, De Caerdydd a Phenarth, Y Rhondda, Wrecsam.

Canghennau: Treherbert, Porth, Pentre, Bro Ingli, Llanelli, Treorci, Castell Nedd, Porth Tywyn.

Elin Jones

Etholaethau: Islwyn, Ceredigion

Canghennau: Talybont, Llanbed, Sion Cwilt

Dafydd Elis-Thomas

Etholaethau: Dwyfor Meirionnydd, Gorllewin Caerdydd

Canghennau: Llanuwchllyn, Y Tyllgoed

Simon Thomas

Etholaethau: Mynwy, Canol Caerdydd