Guto Bebb
Mae gwerth biliynau o arian grant o Ewrop – Amcan Un – sydd wedi ei wario yn ardaloedd tlotaf Cymru wedi bod yn fethiant enbyd, a’r sector gyhoeddus sydd ar fai.

Dyna gasgliad yr AS Guto Bebb yng nghylchgrawn Golwg yr wythnos hon.

“Er gwaethaf derbyn arian Amcan Un ers 1999 ac arian Cydgyfeirio, mae Cymru yn dlotach heddiw na’r hyn oedd yn wir yn 199,” meddai’r Tori yn ei ddydiadur wythnosol i’r cylchgrawn.

“Yn wir, Cymru yw un o chwe rhanbarth allan o 56 ddaru dderbyn arian Amcan Un yn 1999 sydd wedi gweld dirywiad yn ein sefyllfa. Pa syndod gyda 99.5% o holl gyllid Amcan Un dan arweiniad prosiectau o fewn y sector gyhoeddus?”

Ac mae un o’r ymgeiswyr yn y ras i olynu Ieuan Wyn Jones yn cytuno i raddau.

“Mae’n wir i ddweud nad yw Cymru wedi gwella’n economaidd yn y deng mlynedd diwethaf,” meddai Simon Thomas wrth Golwg360.

Ond doedd e ddim yn cytuno gyda gosodiad Guto Bebb fod ‘Amcan un wedi methu’. Dywedodd Simon Thomas efallai base Cymru mewn gwaeth cyflwr heb yr arian ychwanegol yma.

Gweledigaeth Simon Thomas yw Cymru fwy mentrus yn sefyll ar ei thraed ei hun. “Fi isie gweld diwedd i’r ‘grant culture’, ond ddim trwy ‘big bang’ dros nos.”

Dywedodd fod y llywodraeth yn Llundain yn gwneud hyn yn rhy gyflym. Dywedodd hefyd fod polisi’r llywodraeth o dorri swyddi cyhoeddus a disgwyl i swyddi preifat gymryd eu lle wedi bod yn fethiant.

“Pam ryda ni’n fodlon i Gymru fod yn ddibynadwy? Mae angen mwy o gyfoeth yng Nghymru.”