Aled Brew
Mae Dreigiau Casnewydd Gwent wedi cyhoeddi y bydd yr asgellwr, Aled Brew, yn gadael y rhanbarth ar ddiwedd y tymor.

Fe fydd yn ymuno â ‘Chlwb Ewropeaidd’ – ond does dim manylion ynglŷn ag enw’r clwb eto.

Mae’r asgellwr 24 oed wedi treulio dau gyfnod â’r Dreigiau, gan ennill dros 100 cap i’r rhanbarth, ac ennill wyth cap dros Gymru yn y cyfamser.

“Rydw i’n edrych ymlaen at symud dramor ond yn gadael y Dreigiau â chalon drom,” meddai.

“Cefais gynnig chwarae i dimoedd eraill yng Nghymru a Lloegr ond doedd gen i ddim diddordeb.

“Mae’r Dreigiau wedi rhoi’r cyfle i mi chwarae rygbi rhanbarthol, ac wedi helpu i mi gyflawni fy uchelgais o chwarae rygbi rhyngwladol.”

Halen yn y Brew

Roedd Aled Brew yn rhan o sgwad Cymru yng Nghwpan Rygbi’r Byd ond ni chafodd ei gynnwys yn sgwad y Chwe Gwlad eleni.

“Roedd peidio â chael fy nghynnwys yn y sgwad wedi chwarae rhan yn fy mhenderfyniad i symud dramor. Ond rydw i hefyd yn gobeithio y bydd profi cynghrair gwahanol yn fy ngwneud i’n chwaraewr gwell,” meddai.