Mae’r heddlu wedi cyhoeddi mai dynes 20 oed o Ddinbych fu farw ar ôl i’w char fod mewn gwrthdrawiad â lori yn  Sir Amwythig ddydd Sul.

Roedd Catrin Rebecca Pickles yn gyrru ei char Vauxhall Corsa Hatch lliw arian ar yr A525 i gyfeiriad yr Eglwys Wen (Whitchurch) pan fu mewn  gwrthdrawiad â lori Volvo lliw gwyn oedd yn teithio yn y cyfeiriad arall, tua 9.20pm nos Sul.

Bu farw Catrin Pickles yn y fan a’r lle. Ni chafodd y gyrrwr ei anafu ond cafodd driniaeth am sioc.

Mae Heddlu Gorllewin Mercia yn dal i ymchwilio i achos y ddamwain ac wedi apelio eto am wybodaeth. Mae nhw’n awyddus i holi unrhyw un a welodd y ddamwain neu a oedd wedi gweld y cerbydau’n cael eu gyrru ychydig cyn y gwrthdrawiad. Y rhif i’w ffonio yw 101.

Fe fydd post mortem yn cael ei gynnal a disgwylir i gwest gael ei agor a’i ohirio yn ddiweddarach yr wythnos hon.