Leanne Wood
Mae criw llengar o gefnogwyr Leanne Wood wedi datgan eu cefnogaeth i’r ymgeisydd am arweinyddiaeth Plaid Cymru  heddiw trwy lunio englyn iddi.

Mae’r beirdd a’r llenorion Dewi Prysor, Catrin Dafydd, Mike Jenkins ac Iwan Rhys i gyd wedi datgan eu cefnogaeth i Leanne Wood erbyn hyn.

I ddathlu’r gefnogaeth honno mae un o’r beirdd, Iwan Rhys, cyn-enillydd Cadair yr Urdd a brodor o Gwm Gwendraeth sydd bellach yn byw yng Nghaergybi, wedi cyfansoddi englyn i ymgrych Leanne Wood:

Leanne, rhaid mynd amdani – ac uno’r
genedl; bydd â’i hegni’n
arweinydd eiddgar inni.
Leanne Wood – ymlaen â ni!

‘Gosod yr agenda’

Yn ôl yr awdures Catrin Dafydd, sydd yn byw yng Nghaerdydd, mae’r criw wedi penderfynu cefnogi Leanne Wood am fod angen “arweinydd ar y mudiad cenedlaethol fydd yn medru gosod yr agenda i Gymru.”

Wrth ychwanegu ei henw at y rhestr hir sydd eisoes wedi datgan eu cefnogaeth i Leanne Wood, dywedodd Catrin Dafydd fod y “newidiadau cyfansoddiadol enfawr” sy’n digwydd yn y DU ar hyn o bryd yn golygu bod angen “arweinydd sy’n glir ynglŷn â’r camau nesaf at annibyniaeth. Arweinydd all apelio at bobl Cymru benbaladr a sicrhau ein bod yn gwella economi Cymru,” meddai.

“Leanne Wood sydd â’r weledigaeth honno i’n symud ni ymlaen. Yn barod ry’n ni wedi gweld fod ganddi’r gallu i uno ac ysbrydoli aelodau’r Blaid ond mae hi hefyd wrthi’n torri tir newydd wrth i undebau ac aelodau newydd fel ei gilydd gefnogi’r Blaid am y tro cyntaf erioed.”

Wrth i’r llenor o Ferthyr, Mike Jenkins, ddatgan ei gefnogaeth i Leanne Wood, dywedodd ei fod yn teimlo, “fel awdur, fod gweledigaeth ymarferol a dychmygus Leanne ar gyfer Cymru wahanol yn un gyffrous iawn: cyfuniad unigryw o gynaliadwyedd a sosialaeth fel gwrthbwynt i negyddiaeth polisïau’r toriadau.”