Ryan Giggs
Cafodd Ryan Giggs ei enwi yn y llys am y tro cynta’ fel y pêl-droediwr a oedd wedi sicrhau gorchymyn llys i atal papur newydd y Sun rhag cyhoeddi honiadau ei fod wedi cael perthynas gyda’r fodel Imogen Thomas.
Fe gytunodd seren Manchester United a Chymru i godi’r gwaharddiad yn ystod gwrandawiad yn yr Uchel Lys heddiw.
Roedd Giggs, 38, wedi sicrhau’r gorchymyn llys fis Ebrill y llynedd ond cafodd ei enw ei ddatgelu gan filoedd o bobl ar wefan Twitter ac yn y Senedd gan yr Aelod Seneddol John Hemming.
Iawndal
Mae’r barnwr Mr Ustus Tugendhat bellach yn ystyried cais am iawndal gan Giggs sy’n honni bod y Sun wedi amharu ar ei breifatrwydd.
Ond mae News Group Newspapers, sy’n cyhoeddi’r Sun, yn dadlau y dylai’r cais gael ei atal.
Mae’r pel-droediwr hefyd yn ceisio sicrhau gorchymyn llys i atal cyhoeddi unrhyw wybodaeth breifat amdano yn y dyfodol.