Cynyddu maint testun

Golwg360

Newyddion



Plaid yn beirniadu triniaeth y BBC o’r anghydfod taliadau

Ionawr 2, 2013 16:19


Mae Plaid Cymru wedi beirniadu BBC Cymru am y modd y mae wedi ymdrin â’r anghydfod dros daliadau darlledu.

Yn ôl Aelod Seneddol Dwyfor Meirionnydd, Elfyn Llwyd mae Radio Cymru yn dioddef er mwyn i’r BBC gael “gwarchod y berthynas gyfforddus gyda’r PRS.”

“Mae’r anghydfod presennol wedi bod yn corddi ers misoedd bellach,” meddai, a dywedodd y “dylasai bwrdd y BBC yng Nghymru fod wedi bod yn gwneud llawer mwy o ran trafod wirioneddol ac ystyrlon.”

“Mae bywoliaeth artistiaid yng Nghymru, y sin roc a cherddoriaeth Gymreig,  dan fygythiad, a thrwy hynny mae’r iaith a’r diwylliant yn cael eu tanseilio,” meddai Elfyn Llwyd.

1/4 o beth mae’r Asian Network yn ei dderbyn’

Mae’r anghydfod am daliadau cerddorion yn parhau ac ni fydd Eos a’r BBC yn cwrdd tan wythnos nesaf er mwyn ceisio dod i gytundeb.

Mae’r anghydfod wedi cael sylw y tu hwnt i Gymru, ym mhapurau Llundain, ac wedi ei drafod heddiw ar raglen Jeremy Vine ar BBC Radio 2.

Mae cwmni cerddoriaeth Sain wedi rhyddhau datganiad yn dweud fod “cynnig y BBC i Eos gyfystyr â 1/4 o beth mae’r Asian Network yn ei dderbyn.”

“Nid yw’r cynnig yn sylweddol, ac nid yw Eos hyd yn oed yn gofyn am gydraddoldeb gyda’r Asian Network.”

Mae Radio Cymru wedi gorfod cyfyngu ar nifer y caneuon mae’n eu chwarae ers ddoe, ac wedi cwtogi dwy awr oddi ar y gwasanaeth.

Ddydd Llun roedd Ymddiriedolwr Cenedlaethol y BBC dros Gymru, Elan Closs Stephens, wedi rhyddhau datganiad yn “erfyn ar y ddwy ochr i ddod i gytundeb teg a fforddiadwy er mwyn i Radio Cymru allu unwaith eto ddarparu ei gwasanaeth llawn, sydd mor annwyl gan ei chynulleidfa.”

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y ddolen ’Nodi camddefnydd’ sy’n ymddangos wrth ymyl pob sylwad. Os bydd dau berson yn anhapus, bydd y neges yn dod yn ôl at Golwg360 i’w ddilysu.


B Griffiths , Ionawr 2, 2013 7:22 pm

Mae angen i staff Radio Cymru meddwl o ddifri am gweithredu diwydiannol i gefnogi ein cerddorion Cymreig. Mae BBC Llundain wedi dangos dim mymryn o barch at y gorsaf radio nag at ein iaith. A roedd rhaglen Jeremy Vince oedd i fod yn i drafod y fater hon yn gwbl warthus, dim ond esgus i wrth-wynebwyr yr iaith dangos eu hatgasedd at Cymru a’r iaith. Digon yw digon.

§| Nodi camddefnydd

Rhiwlyg , Ionawr 2, 2013 7:43 pm

Ai fi yw’r unig un i sylwi pa mor dila a didalent yw rhai o gyflwynwyr Radio Cymru heb fod ganddynt gerddoriaeth i gwato’u gwendidau? Mae’u hanallu i gynnal sgwrs yn fyddarol ar adegau. Da chi Radio Cymru talwch bris teg am ganeuon ein gwlad – ni allaf oddef rhagor o hyn.
Petae hon yn ornest focsio fe fyddai’r dyfarnwr wedi dirwyn yr ornest i ben ers tro. Mae Radio Cymru ‘on ddy rops’ – tywel amdani!

§| Nodi camddefnydd

Jac , Ionawr 2, 2013 8:07 pm

A phob parch i gyflwynwyr Radio Cymru. Mae yna rai da iawn sydd gyda gafael wych ar yr iaith, er fod yna rai eraill sydd angen gwella. Gadewch i ni gadw at wraidd y broblem – mae’n ymddangos erbyn hyn fod llawer yn gweld bai ymhob dim ar Radio Cymru. Dwi’n cytuno gyda B Griffiths – mae angen i’r staff sy’n gweithio i’r BBC ac sy’n cefnogi Eos ‘yn ddistaw bach’ i sefyll i fyny i’w cyd-Gymry. Mewn undod mae nerth. Daliwch ati Eos i ddal eich tir – trueni na fyddai bosus Radio Cymru wedi datrys y broblem sbel yn ol cyn iddi gyrraedd y dibyn. Mae dyfodol Radio Cymru rwan yn nwylo y rhai sy’n ei rheoli. Mynnwch daliad teg i gerddorion a cherddoriaeth Cymru a sefwch yn gadarn yn erbyn gormes y Sais o dros y ffin neu gadewch i’r wasg Bryneinig barhau i’n chwalu ni’n rhacs….

§| Nodi camddefnydd

eirwen , Ionawr 2, 2013 8:08 pm

Dim bai Radio Cymru yw hyn- Llundain sy’n rheoli’r pwrs o ran hawliau.

§| Nodi camddefnydd

Rhiwlyg , Ionawr 2, 2013 8:13 pm

Rwy’n cytuno gyda sylwadau’r ddau ohonoch. ‘Cheap shot’ oedd fy sylw cyntaf. Carwn dynnu hynny’n ol.

BBC – calliwch. Talwch yn deg am ganeuon ein gwlad.

§| Nodi camddefnydd

Rhys Harris , Ionawr 2, 2013 8:49 pm

Dyma ychydig o ffeithiau i chi:
Incwm y BBC o’r drwydded – £5 biliwn
Cyllideb Radio Cymru – £12 miliwn
Trwydded blanced y BBC i’r PRS llynedd – £50 miliwn
Siar cerddorion Cymraeg o’r PRS llynedd £110,000.
Cerddoriaeth fel canran o’r oriau a ddarlledir gan Radio Cymru – 40%
Tal i gerddorion Cymraeg fel canran o gyllideb Radio Cymru – 0.92%
Talodd y BBC dim byd i aelodau Eos llynedd, dim ond £50 miliwn i’r PRS.

Cafodd y pwynt ei wneud yn rhaglen Jeremy Vine bod cerddorion yn derbyn “nawdd” allan o ffi y drwydded. Na, tal am drwydded ydyw am ddefnyddio can sydd ag hawlfraint arno.

§| Nodi camddefnydd

Martin Wilias , Ionawr 3, 2013 6:01 pm

Dyma fydda un stori o lwyddiant:
Hen sdwff SRG/S4C ar BBC4. Hefo isdeitlau Saesneg. Dim trosleisio i’r iaith fain. Mae artistiaid talentog fel Jarman, Stevens yn haeddu mwy o glod a ffans.
Os oes yna broblem o ran cytundebau/hawlfraint…yna mae hyn yn uffernol o ddiflas. A ellir datrys y broblem?
Rhaid i Blaid Cymru sgwennu i’r BBC yn MYNNU sylw i gerddoriaeth Gymraeg ar BBC4. Dim lol. Dim mwydro. Dim esgusodion. Plaid Cymru- profwch eich bod yn uchelgeisiol!
Pawb a’i frwydrau iaith…
Hefyd- digon o dracs Cymraeg ar Radio6Music, Radio Wales?

§| Nodi camddefnydd

Steffan Webb , Ionawr 3, 2013 10:52 pm

Mae hyn i gyd yn ddiflas iawn, dylai cerddorion Cymraeg dderbyn yr un arian a cherddorion Saesneg. Mae unrhywbeth arall yn hollol anheg.

Y gwirionedd yw bod BBC Lloegr yn gwrthod rhoi ein harian trwydded yn ol i ni. Mae eisiau protestio!

§| Nodi camddefnydd

B Griffiths , Ionawr 3, 2013 11:32 pm

Rwy’n cytuno llwyr a ti Martin. Ond pam oes rhaid i’r Blaid wneud pob dim, lle mae’r pleidiau eraill? Mae nhw wedi bod yn ddistaw iawn. Ble mae Leighton Andrews er enghraifft yn sefyll ar y mater?

§| Nodi camddefnydd

Cedwyn Aled , Ionawr 5, 2013 9:51 am

Os mae Asian Network gyda ryw 600,000 o wrandawyr yn talu £6 y munud, mae rhaid cyfadde bod cynnig Radio Cymru, sydd gyda 150,000 o wrandawyr, o £1.50 y munud yn gwneud ryw fath o sens i fi.

Hynny yw, mae’n edrych fel bod y cynnig BBC Cymru yn dilyn yr un fformiwla a’r un gyda’ Asian Network, sef am bob 100,000 o wrandawyr talwyd £1 ac pa bynnag ffracsiwn. Mae’n dishgwyl i fi bod y BBC yn gyson fan hyn.

Felly os dwi wedi cael fy syms yn gywir, gai ofyn yn barchus os nac ydy’r cynnig o £1.50 yn ‘torri’r mwstard’ beth yw rheswm EOS am gwrthod? Odi nhw’n meddwl bod nhw’n haeddu well telerau na’r Asian Network? Os felly, beth yw’r rhesymeg am gerddorion Cymraeg yn haeddu well telerau na cherddorion Asia?

§

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y ddolen ’Nodi camddefnydd’ sy’n ymddangos wrth ymyl pob sylwad. Os bydd dau berson yn anhapus, bydd y neges yn dod yn ôl at Golwg360 i’w ddilysu.


Dynodir blychau angenrheidiol â *.

Ni chaiff eich cyfeiriad e-bost ei gyhoeddi. Wrth anfon y ffurflen rydych yn cytuno â thelerau ac amodau Golwg360.