Dafydd Iwan
Mae Dafydd Iwan wedi datgelu heddiw mai Leanne Wood AC fydd yn cael ei gefnogaeth ef ar gyfer ras arweinyddiaeth Plaid Cymru.

Mae cyn-Lywydd Plaid Cymru yn dweud ei fod yn credu y gallai Leanne Wood “danio dychymyg cefnogwyr newydd” ac uno pobol o bob rhan o Cymru gyda’i gweledigaeth.

“Angen mawr Cymru a Phlaid Cymru heddiw yw diddordeb a chefnogaeth pobol o bob rhan o’n cenedl,” meddai Dafydd Iwan.

“Leanne yw’r ymgeisydd sy’n gallu tanio dychymyg cefnogwyr newydd, a hi hefyd sy’n ail-gydio yng ngwleidyddiaeth economaidd wreiddiol y Blaid, sy’n seiliedig ar y gymuned.”

‘Parch’

Dywedodd Leanne Wood heddiw bod Dafydd Iwan wedi gosod sawl esiampl da i’r Blaid dros y blynyddoedd, a’i bod hi’n gobeithio adeiladu ar hynny.

“Mae parch mawr iddo ym mhob rhan o’r wlad am ei gyfraniad efnawr i ddiwylliant, cymdeithas a gwleidyddiaeth Cymru,” meddai.

“Mae’n ffigwr sydd wedi uno’r Blaid dros y blynyddoedd, ac mae hynny’n rhinwedd y byddaf innau’n ceisio ei hefelychu os byddaf yn llwyddiannus yn ras yr arweinyddiaeth.”

Bydd Dafydd Iwan yn cadeirio cyfarfod fel rhan o ymgyrch arweinyddol Leanne Wood yn Neuadd Penygroes, ger Caernarfon, nos Wener.

Lan a lan: nifer cefnogwyr Leanne…

Dafydd Iwan yw’r diweddaraf o blith enwau amwlg Plaid Cymru i roi eu cefnogaeth i Leanne Wood.

Erbyn dyddiad cau cyflwyno enwebiadau ar gyfer y ras am arweinyddiaeth y blaid, roedd ei rhestr o gefnogwyr yn cynnwys y cyn-AS Adam Price, ynghyd â Jonathan Edwards AS, a Bethan Jenkins AC.

Roedd Leanne Wood hefyd wedi cael ei henwebu ar gyfer yr arweinyddiaeth gan 14 o etholaethau a changhennau erbyn y dyddiad cau ar 26 Ionawr, gan gynnwys Wrecsam, Dwyrain Abertawe, Maldwyn Gŵyr a De Caerdydd, a changhennau Porth Tywyn, Castell Nedd a Bro Ingli.

Y tri arall yn y ras ar gyfer arweinyddiaeth Plaid Cymru yw Dafydd Elis-Thomas, Simon Thomas, ac Elin Jones – ei chystadleuydd pennaf yn ôl y bwcis.

Mae Elin Jones hefyd wedi denu rhai o aelodau blaenllaw y blaid i’w rhengoedd, gan gynnwys Hywel Williams AS a Nerys Evans, y cyn-AC.

Yn ystod y mis nesaf, bydd Elin Jones, Leanne Wood, Dafydd Elis-Thomas a Simon Thomas yn mynd ben-ben ar draws Cymru mewn cyfres o hystings cyhoeddus, cyn i’r aelodau dderbyn eu pleidlais bost ddiwedd y mis.

Mae disgwyl i enw’r arweinydd newydd gael ei gyhoeddi ar 15 Mawrth.