Alex Salmond
Mae arweinwyr y gwrthbleidiau yn yr Alban wedi beirniadu Alex Salmond ar ôl iddo alw un o swyddogion y BBC yn “Gauleiter”.

Roedd Prif Weinidog yr Alban wedi beirniadu’r gorfforaeth ar ôl iddyn nhw ganslo ei ymddangosiad ar raglen i drafod dechrau pencampwriaeth y Chwe Gwlad.

Dywedodd Alex Salmond fod newyddiadurwyr y BBC “yn gaeth i Stryd Downing” a bod y gorfforaeth yn “unbennaeth fechan”.

Galwodd un o swyddogion y BBC yn “Gauleiter”, enw’r llywodraethwyr rhanbarthol yn yr Almaen yng nghyfnod Hitler wrth y llyw.

Cwynodd Llafur yr Alban ei fod yn “sarhad hyll”, ac mae’r Ceidwadwyr wedi ei alw yn “fwli”.

“Mae pobol eisiau i’r Prif Weinidog gefnogi’r tîm, nid dangos ei hun ar y teledu,” meddai llefarydd materion allanol yr wrthblaid, Patricia Ferguson.

“Mae’n hollol annerbyniol fod y Prif Weinidog wedi cymharu newyddiadurwyr ag arweinwyr rhanbarthol y Natsïaid. Mae’n sarhad hyll.

“Efallai nad oedd yn gwybod pa mor sarhaus yw’r term, ac os felly fe ddylai dynnu ei sylwadau yn ôl.”

Dywedodd y BBC eu bod nhw wedi penderfynu na ddylai Alex Salmond ymddangos ar y rhaglen er mwyn sicrhau bod eu “holl allbwn yn amhleidiol”.

“Penderfynwyd nad oedd yn weddus rhoi gormod o sylw i un arweinydd gwleidyddol yng nghyd-destun gêm yr Alban yn erbyn Lloegr.”