Meirion Prys Jones
Mae Prif Weithredwr Bwrdd yr Iaith Gymraeg wedi dweud bod y Gymraeg yn marw fel iaith gymunedol.

Mewn cyfweliad ar raglen Sunday Politics BBC Cymru dywedodd Meirion Prys Jones bod y nifer sy’n gallu siarad Cymraeg wedi cynyddu, ond bod gostyngiad wedi bod yn y nifer sy’n ei defnyddio.

“Rwy’n credu fod yr iaith yn tyfu mewn rhai ffyrdd, ond fel iaith gymunedol, mae’n marw,”meddai.

Ac fe ychwanegodd fod rhaid cael buddsoddiad o ran syniadau ac arloesi er mwyn sicrhau chwarae teg i’r iaith.

Mae Meirion Prys Jones yn pryderu pwy fydd yn arwain y gwaith creadigol ynglŷn â’r iaith ar ôl i Fwrdd yr Iaith Gymraeg ddiflannu ym mis Ebrill eleni.

“Pwy o fewn y cylchoedd gwleidyddol a’r gwasanaeth sifil fydd yn dweud yn ymarferol bod angen i ni wneud rhywbeth am yr iaith Gymraeg, mae mewn argyfwng, sut ydym am ei hyrwyddo?

“Gallwch gael gymaint o ddeddfwriaeth ag y dymunwch, gallwch gael gymaint o bolisïau ag y dymunwch, ond oni bai eich bod yn mynd allan ymysg y bobl a’u darbwyllo bod yr iaith yn ddefnyddiol iddyn nhw, yna does dim gobaith yn fy marn i.”

Meddai llefarydd ar ran Lywodraeth Cymru, “Mae’r Llywodraeth yn benderfynol o weld y Gymraeg yn ffynnu.”

Bydd Llywodraeth Cymru yn lansio ei strategaeth iaith Gymraeg ar Ddydd Gŵyl Dewi, deg mlynedd ar ôl y strategaeth bresennol, ‘Iaith Pawb.’