Cledrau
Mae hyfforddiant y mae mudiad y Samariaid yn ei roi i staff rheilffordd, wedi arwain at ostyngiad yn nifer y rheiny sy’n cael eu lladd gan drenau.

Mae dros 1,000 o staff mewn 220 o lefydd ym mhob cwr o’r rhwydwaith rheilffordd, wedi derbyn cyngor rhwystro hunanladdiad mewn rhaglen hyfforddi dros y flwyddyn ddiwethaf.

Mae ystadegau diweddar yn dangos fod 207 o bobol wedi taflu eu hunain o flaen trenau yn ystod 2010/11 – ac mae’r ffigwr yn dangos gostyngiad o 11% ar y nifer yn 2009/10.

Mae’r rhaglen hyfforddiant wedi ei chynllunio ar gyfer y pum mlynedd nesa’, ac mae’n cael ei gefnogi gan £5m gan Network Rail. Mae’n cynnwys cyngor ynglyn a sut mae annog pobol i gamu oddi ar y rheilffordd ac o beryg. Mae hefyd yn dweud sut y dylid rhoi cefnogaeth emosiynol i’r sawl sy’n ystyried hunanladdiad.

Mae’r rhaglen hyfforddi hefyd yn cynnwys cefnogaeth i yrwyr trên sy’n cael eu hypsetio’n arw wedi bod yn rhan o ddigwyddiad lle mae rhywun wedi taflu eu hunain o flaen eu trên.

“Er bod nifer yr hunanladdiadau ar reilffyrdd yn dangos gostyngiad, sy’n galonogol, fe allai cynnydd yn nifer y bobol ddi-waith yn ystod y blynyddoedd nesa’ weld y duedd yn newid,” meddai Rachel Kirby-Rider, Cyfarwyddwr Codi Arian a Chyfathrebu, y Samariaid.