Llun: Gareth Davies
Mae mwy na 650 o bobol mewn gwisg ffansi wedi cymryd rhan yn nofiad Gŵyl San Steffan flynyddol Dinbych-y-Pysgod, heddiw.

Roedd dros 300 yn fwy na’r llynedd wedi cymryd rhan, diolch yn bennaf i’r tywydd mwyn oedd yn hollol wahanol i’r rhew a’r eira yn 2010.

Dyma’r 41fed blwyddyn yn olynol y mae’r dref wedi cynnal y nofiad, ac mae’r digwyddiad yn Sir Benfro wedi datblygu yn un o uchafbwyntiau tymor y Nadolig yn yr ardal ac yn denu pobol o bob cwr o Brydain.

Diolchodd y trefnwyr i’r rheini gymerodd rhan heddiw, oedd mewn amryw o wisgoedd gan gynnwys bananas a setiau teledu.

“Mae mwy na 650 o nofwyr wedi plymio i’r dŵr yn Ninbych-y-pysgod er mwyn nodi 41fed nofiad Gŵyl San Steffan y dref – y mwyaf erioed,” meddai llefarydd ar ran yr ŵyl.

“Roedd tyrfa o filoedd wedi dod mewn tywydd mwyn ond gwlyb er mwyn gwylio’r olygfa gwirion. Roedd rhaid rhedeg yn bell i gyrraedd y môr oherwydd y llanw isel.”

Mae’r dref wedi cael hyd yn oed mwy o sylw eleni ar ôl i archfarchnad Tesco benderfynu cynnwys y digwyddiad yn eu hysbyseb Nadoligaidd.

“Mae’r tywydd wedi bod yn garedig i ni ac fe ddaeth tyrfa anferth i lenwi’r traeth,” meddai Chris Osborne, cadeirydd y nofiad.

“Mae Dinbych-y-Pysgod wedi cael llawer mwy o sylw na’r arfer ar y teledu eleni ac roedd yn braf gallu cau pen y mwdwl ar y flwyddyn drwy dorri’r record am nifer y nofwyr.”

Mae’r digwyddiad wedi codi miloedd i elusennau, gan gynnwys Gofal Canser Sir Benfro, Hafan Cymru a’r Ganolfan Achub Elyrch.