Mae dau ddyn o’r Unol Daleithiau
gafodd eu carcharu am wyth mlynedd am ysbio, wedi cael eu rhyddhau ar fechniaeth o garchar yn Tehran, yn ôl adroddiadau.
Credir bod Shane Bauer a Josh Fattal wedi gadael carchar Evin a’u bod nhw wedi hedfan o’r wlad.
Cafodd y ddau eu harestio yn 2009 ar ôl croesi i Iran o Irac, lle roedden nhw’n honi eu bod yn heicio, a chawson nhw eu dedfrydu ym mis Medi eleni.
Gadawodd y ddau, sy’n 29 oed, funudau ar ôl i’w cyfreithiwr, Masoud Shafiei, orffen y gwaith papur a fyddai’n sicrhau eu bod yn cael eu rhyddhau.
Dywedodd bod yr arian ar gyfer eu mechniaeth, tua $500,000 yr un, wedi cael ei dalu gan dalaith Oman, sydd â pherthynas da â Iran.
Dywedodd llefarydd ar ran yr Unol Daleithiau na fyddan nhw’n gwneud datganiad ynglyn â’r datblygiadau nes bod y ddau wedi gadael Iran.
Mae’r achos wedi gwaethygu tensiynau rhwng yr Unol Daleithiau a Iran – dywedodd Ysgrifennydd Gwladol yr UDA Hillary Clinton ei bod hi’n “siomedig iawn” ynglyn â’r dedfrydau.
Mae Bauer a Fattal wedi mynnu o’r dechrau eu bod yn ddi-euog a’u bod wedi croesi’r ffin drwy ddamwain tra ar wyliau cerdded.