Mae Rwsia wedi bygwth dinistrio systemau amddiffyn yr Unol Daleithiau yn Ewrop gyda thaflegrau os yw Washinton yn bwrw ymlaen â chynlluniau i greu tarian amddiffynnol iddyn nhw eu hunain yn Ewrop, meddai’r arlywydd Dimitry Medvedev heddiw.

Mae Rwsia wedi bygwth gosod taflegrau yn y darn mwyaf gorllewinol o Kaliningrad ac ar draws y wlad os nad yw Rwsia a Nato yn llwyddo i ddod i gytundeb dros y cynlluniau amddiffyn sy’n cael eu harwain gan yr Unol Daleithiau, meddai’r arlywydd.

Mae Rwsia yn ystyried y cynlluniau i greu tarian amddiffynnol yn erbyn taflegrau ymosodol i fod yn fygythiad i’w grymoedd niwclear, ond mae Obama yn mynnu eu bod nhw i fod i atal unrhyw fygythiad gan Iran.

Mae Mocscow wedi cytuno i ystyried cynigion Nato i gyd-weithio ar y darian amddiffynnol, ond mae trafodaethau wedi dod i stop ynglŷn â’r modd y dylai’r system weithio.

Mae Rwsia yn mynnu y dylai’r system gael ei redeg ar y cyd – cynnig sydd wedi ei wrthod gan Nato.

Mae cynlluniau’r Unol Daleithiau yn ymwneud â gosod systemau radar ar dir a môr ac atalwyr mewn lleoliadau ar draws Ewrop yn ystod y ddegawd nesaf, a’u diweddaru dros gyfnod o amser.

Ond mae Dimitri Medvedev wedi rhybuddio y bydd yn gosod taflegrau ac arfau ar draws Rwsia er mwyn targedu systemau amddiffyn yr Unol Daleithiau os yw’r cynllun yn mynd ymlaen fel y mae ar hyn o bryd.