Muammar Gaddafi
Roedd gan unben Libya, Muammar Gaddafi, stoc bentwr o arfau cemegol, yn ôl archwilwyr rhyngwladol.
Dywedodd y Corff Er Mwyn Atal Arfau Cemegol fod archwilwyr wedi bod yn Libya’r wythnos hon ac wedi dod o hyd i sieliau nwy mwstard.
“Maen nhw’n arfau rhyfel cemegol,” medden nhw. Doedden nhw ddim yn cynnwys nwy mwstard ar y pryd ond dyna oedd diben eu creu nhw, meddai’r corff.
Roedd arweinwyr newydd Libya wedi rhoi gwybod i’r corff am y cemegau y llynedd ar ôl dymchwel Gaddafi.
Cafodd ei ladd ym mis Hydref ar ôl cael ei ddal gan wrthryfelwyr.
Roedd Muammar Gaddafi wedi rhoi gwybod i’r awdurdodau rhyngwladol fod ganddo arfau cemegol yn 2004 wrth iddo geisio ail-adeiladu ei berthynas â gwledydd y gorllewin.
Roedd Libya wedi addo dinistrio eu harfau cemegol erbyn 29 Ebrill eleni.