Mae nifer o Eifftwyr yn beio’r heddlu am fethu ag atal terfysg mewn gem bel-droed lle roedd 74 o bobl wedi marw.
Cafodd nifer o gefnogwyr eu lladd yn y rhuthr i adael y stadiwm tra bod eraill wedi cael eu trywanu.
Yn ystod sesiwn brys o’r senedd fe gyhoeddodd y Prif Weinidog Kamal el-Ganzouri bod pob aelod o Gymdeithas Bel-Droed y wlad wedi cael eu diswyddo ac fe fydd yr aelodau yn cael eu holi ynglŷn â’r trafferthion.
Dywedodd hefyd bod llywodraethwr talaith Port Said a phennaeth yr heddlu yn yr ardal wedi ymddiswyddo.
Mae rhai wedi cyhuddo’r heddlu o beidio ag ymyrryd i geisio atal y terfysg.
Fe ddechreuodd y terfysg ar ôl i ddegau o gefnogwyr redeg ar y maes chwarae yn dilyn y gem yn Port Said ar ôl i’r tîm cartref, Al-Masry, golli yn erbyn un o brif glybiau’r wlad Al-Ahly, sydd wedi eu lleoli yn Cairo.
Cairo
Yn Cairo, roedd cefnogwyr oedd wedi eu cythruddo ar ôl i’r gem yno gael ei ganslo oherwydd y trafferthion yn Port Said, wedi rhoi’r stadiwm ar dân. Ni chafodd neb eu hanafu yn y digwyddiad yno.
Roedd yn bennod waedlyd arall yn hanes y wlad bron i flwyddyn ar ôl i’r cyn Arlywydd Hosni Mubarak gael ei ddisodli.
Mae tridiau o alaru wedi cael ei gyhoeddi yn y wlad heddiw.