Un o etholwyr y wlad yn bwrw ei phleidlais mewn gorsaf bleidleisio yn Riga, prifddinas Latvia, ddoe (Roman Koksarov / Associated Press )
Mae mwyafrif llethol o etholwyr Latvia wedi pleidleisio yn erbyn gwneud y Rwseg yn iaith swyddogol yn y wlad.

Mewn refferendwm ddoe pleidleisiodd tua 75% yn erbyn y cynnig, ac roedd y gyfran uchel – 70% – a drodd allan i bleidleisio’n sylweddol uwch nag mewn etholiadau arferol. Roedd ciwiau hir o bobl i’w gweld y tu allan i orsafoedd pleidleisio ledled y wlad.

Roedd y refferendwm wedi cael ei alw gan fudiad sy’n ymgyrchu dros hawliau’r traean o’r dwy filiwn o bobl y wlad sy’n siarad y Rwseg fel mamiaith.

I’r Latviaid cynhenid, roedd y bleidlais yn cael ei gweld fel ymgais i sathru ar annibyniaeth y wlad. Dywedodd un etholwraig iddi bleidleisio Na gan fod y Latveg yn rhan annatod o hunaniaeth genedlaethol y wlad, ac y dylai felly barhau fel yr unig iaith swyddogol.

Fodd bynnag, roedd mwyafrif o bleidleiswyr yn rhanbarth Latgale yn nwyrain y wlad, sy’n ffinio â Rwsia, o blaid newid y cyfansoddiad i gydnabod y Rwseg fel iaith genedlaethol. Dyma ranbarth tlotaf Latvia ac mae’n cynnwys canran uchel o Rwsiaid ethnig a lleiafrifoedd eraill.

Yn ôl cyfraith y wlad, rhaid i unrhyw un a symudodd i Latvia yn ystod cyfnod yr Undeb Sofietaidd, neu blant i rieni a symudodd yno, basio arholiad mewn Latveg cyn dod yn ddinesydd a chael yr hawl i bleidleisio.