Mae un o gyflwynwyr rhaglen deledu Uned 5 wedi derbyn “ei sialens anodda'” erioed gan y rhaglen, meddai.
Mae Meical Owen yn nofiwr cryf ac mae'n ymarfer yn gyson mewn clwb yng Nghanolfan Hamdden Pwllheli.
Ond, fe wnaeth Uned 5 benderfynu tynnu’r cyflwynydd o gynhesrwydd cymharol pwll nofio Pwllheli a'i daflu i ddyfnderoedd rhynllyd Slofenia.
Roedd o yno er mwyn cystadlu ym Mhencampwriaeth Nofio Aeafol y Byd - yn ystod un o’r gaeafau gwaethaf yn y wlad mewn 30 mlynedd.
"Roedd o’n sialens flinedig iawn, ym mhob ystyr y gair,” meddai.
“Wedi deud hynny roedd hwn yn gyfle i fynd ar daith er mwyn darganfod mwy amdanaf i fy hun a beth yw fy ffiniau.”
Cafodd y rhan fwyaf o’r gwaith paratoi ei gyflawni yn nyfroedd rhewllyd Llyn Padarn, Llanberis.
Cafodd y cwbl ei ffilmio gan gwmni cynhyrchu Antena a ddarlledir fel cyfres fer o fewn Uned 5. Bydd y rhan gyntaf ddydd Sul, Chwefror 7fed (12:30-14:30).
'Y grefft yn marw'
“Ro’ ni’n teimlo fy mod i’n mynd i farw cyn gwneud yr her. Roedd llawer o bobl wedi bod yn negyddol iawn am y sialens. Ro’n i’n poeni’n fawr iawn,” meddai Meical Owen wrth Golwg360.
Er mai ef oedd yr unig gynrychiolydd o Gymru yno, doedd ganddo “ddim amser i feddwl am hynny na phwy oedd o’n ei gynrychioli,” meddai.
“Yn feddyliol, ro’ ni’n meddwl am yr her o hyd - ac roedd hynny’n fy mlino i.”
Mae o’r farn y dylai mwy o bobl ifanc ymddiddori mewn nofio gaeafol.
“Roedd y rhan fwyaf o bobol yno yn hyn - mae’n hawdd gweld y grefft yn marw,” meddai Meical Owen.
Er mwyn sicrhau nad yw hynny’n digwydd mae’r cyflwynydd wedi hel criw o tua 10 o nofwyr Canolfan Hamdden Pwllheli at ei gilydd.
Mae’r criw yn ystyried cystadlu yn y gystadleuaeth yn Slofenia bob dwy flynedd.
Meical a’r siarc mawr gwyn
Yn sgîl yr her nofio aeafol mae’r cyflwynydd wedi cael blas ar antur a bellach yn gobeithio nofio gydag un o siarcod perycla’r byd - y morgi mawr gwyn.
“Dw i’n gobeithio cael mynd mewn cawell gyda great white shark,” meddai Meical Owen.
“Fedra i ddim sbïo ar lun o un o’r siarcod heb sgrechian!” meddai.
Anfon at ffrind